行版XBOX360終於推出，各大遊戲廠商亦適時推出對應遊戲，而Ubisoft最新空戰遊戲《BlazingAngels：SquadronsofWWII》，能真正反映激烈嘅空戰實況，同時又保持高質素靚畫面，對主機要求極高，XBOX360版嘅《BlazingAngels》就可讓空戰迷親身感受二戰戰況！
記者：許福合
上星期試過XBOX360隻大作《N3》，今次試玩呢隻《BlazingAngels》，感覺畫面上雖然比較靜態，不過對機能要求都好高，尤其係戰鬥時，戰機飛彈亂飛嘅場面，配合機身光源及貼圖質感，視覺效果一流，最正係連地面建築都清楚可見，畀人一種高度真實感。
重現二戰實況
遊戲設定背景係二次世界大戰，玩家進入遊戲會成為盟軍一員，如果對二戰有認識，會玩得比較有趣味，因為好幾場著名戰役，都在遊戲中重現，好似偷襲珍珠港、中途島戰役及狂轟柏林等，玩家喺完成戰場目標同時，記得欣賞一下地面風景，因為可以見到艾菲爾鐵塔、巴黎聖母院及倫敦大橋等完美呈現！跟同類遊戲比，最大分別係連建築物都好清晰，即使天空雲層亦好有質感，效果超讚！
AI系統提升技術
按每場戰役時間同年份，可以使用唔同戰機，總數超過40種之多，比較出名有P51野馬、B17及日本零式戰機等，機身紋理清晰可見，又跟足比例，玩起來更有真實感。呢類360度全方位遊戲，控制方面其實好難上手，有時飛飛下，哪邊係天哪邊係地都分唔清，所以遊戲使用咗一個AI系統，可以幫助各位新手機師將飛行技術逐漸提升，同時亦要做好領導工作，事關電腦控制飛機會聽命於玩家指示進攻，集體進攻需要講求戰略。遊戲當然唔少得Live!支援，最多可20人連線，主要以團體戰為主。
PROFILE
遊戲類型：射擊
對應機種：XBOX360
遊玩人數：1-2人
推出日期：3月30日
開發商：Ubisoft
行貨售價：$299
遊戲評語：XBOX360又一款超靚大作，由遠景到近鏡均表現優秀，簡直無可挑剔！
