張婉婷已經好耐冇喺香港拍戲，原來佢構思緊一部以成龍父母為題材嘅電影，並以傳記式手法嚟拍。佢諗住搵姜文做成龍爸爸，鞏俐做成龍媽咪。
穿插歷史鏡頭
張婉婷話部戲原本想喺舊年拍嘅，但因為佢要拍《電影之歌》，所以推遲咗成年先搞呢部戲，預計下半年可以開鏡。
呢部戲主要講成龍父母喺五、六十年代不離不棄、共度時艱嘅感情故事，仲會提到佢哋點樣養育成龍，不過呢部戲係以寫實同虛構結合嘅手法嚟拍，同時仲會穿插好多歷史紀錄片嘅鏡頭。
為尊重成龍，導演一早已同佢溝通過，成龍父子都提供咗唔少資料畀張婉婷。而有內地記者問鞏俐會唔會接呢部戲，佢話如果時間許可，一定會賣成龍一個面子，但姜文就話先睇劇本。
