港股第2次上試萬六大關，衝唔上，係在預期之內，短期會繼續在萬六樓下整固，噚日恒指雖急回279點，收15642，但只要守穩在50日線（15630）水平，或甚至略為回補上周三的上升裂口（15548至15647）才回升，形勢仍不會轉壞。今次回市，估計係大戶為期指轉倉而鋪路，整固完成後再上，應可衝破萬六大關，開展新上升浪。
上升股（唔計認股證）有250隻，大市仍偏向個別發展。早日推介的中新集團（563）同南海控股（680）都逆流而上，中新高收0.94元，升3仙，話明中新唔係池中物，相信日後陸續注資後，「晒士」會不斷壯大，股價初步睇1.2元，中線可見1.5元。南海最高上到7.7仙，回收7.2仙，仍升0.1仙，成交更大增到12.4億股，只要在7仙水平整固後再上，上升目標係10仙。
世紀陽光（8276）氣勢如虹，最高3.975元，收3.9元，升4%，可續持有；德泰中華投資（2324）收0.85元，升3.6%，傳好快會有好消息，目標價仍係1.2元。
購滄州化工快功成
百威國際（718）前日急升，噚日回軟，有可能形成旗形，在50天線（0.235元）水平爭持，若升破0.245元的旗形阻力，上升目標係0.3元，短線可獲利20%。
百威剛於本周一宣布，在4月13日舉行股東特別大會，通過收購滄州化工事項，呢步行動係好消息，因為收購要獲得中央批准，先可以開股東大會，3個禮拜後，收購就大功告成。
百威收購滄州化工（佔12%權益，可增持4.88%），以每股資產淨值計算，非常有利，日後集團不但可獲得穩定的原料供應，且可擔任滄州化工PVC產品的代理，帶來額外收益。
基金看好百威前景，現時美資基金GEM已持有3.12億股（作價0.221元），並向獨立人士以衍生工具形式購入6.14億股，使持股量達18%，成為集團第2大股東。另外，Wealthguard投資持有20.45%，傑鷹中國基金持有5.04%。GEM係美國大基金，投資策略以中長線為主，資本逾200億美元。
郭兆誠