張偉文（Donald）彈起，自此之後靚聲熱潮湧住嚟，沉默咗幾十年嘅Fans同時翻生撐偶像。亦因為咁，每個星期日當我返到屋企想睇吓波嘅時候，都見阿爸阿媽伏喺電視前面睇「靚聲演鬥廳」，聽唔到最愛球星花名，卻聽到一啲咩大公仔、伍公子呢類𢱑爆頭綽號，仲有咩歌仙歌佛都出晒嚟。最震撼一幕，係見到有一群，係一群師奶Fans企晒起身舉晒燈牌左搖右擺。細問之下，仲發現張偉文喺52歲之齡成立咗自己第一個歌迷會，會員人數更過400人！音樂無疆界，原來仲無年齡分界。
記者：馬慶武
攝影：伍慶泉、陳智良
俾老公仔女笑繼續撐
眨吓眼，歌迷會3大支柱已經將自己嘅珍藏鋪滿枱面，其中仲有好多自己整嘅相集、紙牌，筆者忍唔住要問：「你哋整緊呢啲紙牌嘅時候，老公有無笑你哋呢吓？」Amy：「何止老公呀！我啲仔女都笑我㗎，但係我真係鍾意聽佢唱歌，所以想出嚟支持佢繼續唱。有咩好笑？你媽咪鍾唔鍾意聽佢啲歌吖？」鍾意……淨係買吓碟，真係無咩好笑。
重遇張偉文 似中六合彩
歌迷Tina最犀利，由78年Donald贏業餘歌唱比賽已經「睇中佢」，由幕前撐Donald到幕後，再撐番嚟幕前：「我仲記得佢嗰晚唱《離別的叮嚀》，好好聽呀！」Donald插口：「我仲記得第二日報紙話唔明我點解咁肥都可以攞獎㖭！」Tina繼續發表支持宣言：「之後佢轉幫人唱和音，有一次唔知邊個演唱會見到佢喺和音席，我嗰下真係有中六合彩嘅感覺。我即時嗌佢，不過太遠佢聽唔到。」不惑幾近知天命之年，仲迷偶像？好彩，Tina話老公、仔女都支持佢：「我同個女去聽張偉文，見到有得加入歌迷會，我都好驚俾人話40幾50歲仲搞啲咁嘅嘢，但係我個女都支持我，佢話佢都覺得Donald唱歌好聽，話如果我鍾意就加入一齊玩啦。就係咁，就加入咗喇。」
餅印緣似偶像甜入心
迷咗Donald5年嘅Wendy，個個話佢個樣似張偉文，一聽到即刻笑唔停：「哈哈，我鍾意聽佢啲歌聲啫，唔係鍾意樣，仲細咩？」確係有幾分似喎！
歌迷會有70歲粉絲
張偉文喺上年成立有生以嚟第一個歌迷會「張偉文好友歌迷會」，「開頭都掙扎咗一陣，咁大年紀先成立歌迷會，都幾好笑，但係可以聚集歌迷就好似食咗定心丸，仲可以問吓佢哋鍾意聽咩歌，𠵱家好似多咗班朋友咁，幾好！」歌迷會現有400人，最年老一位已經70幾歲！除咗真係鍾意唱歌，今次再次走到幕前，張偉文坦言都係為搵錢：「股市樓市都冧我都揩咗少少，咪諗住出嚟試吓囉，反應又幾好喎，我都唔知點解。」即將會喺溫哥華舉行演唱會的他，曾於多倫多撞番好多舊歌迷：「佢哋移晒民都仲帶住我啲舊黑膠碟！以前做歌手時有Fans喺後台等我，我鍾意叫佢哋返屋企讀書，聽歌買碟咪得囉。點知話話吓真係無Fans喇喎！」說到歌迷，張偉文說：「唔能夠怪𠵱家啲歌手唱功差，歌迷要咩歌手咪畀咩囉，只係𠵱家啲歌迷唔要求唱功啫。」
老牌陳浩德撼贏後生
追偶像唔係𡃁妹專利，呢日直擊Donald都上去表演過嘅「靚聲演鬥廳」，再次印證咩叫風魔。人氣唔夠Donald勁嘅陳浩德，竟可以橫掃會場，大露背嘅「大公仔」關菊英都唔夠佢受歡迎。一入場已見師奶們拖個紅白藍，內藏寫住「浩德」、「德哥」閃燈牌，再有系統地派發畀各歌迷。尖叫嘅揮埋手，舉牌嘅跳埋舞，手揸螢光棒嘅又企埋起身，場面壯觀懾人，令見識少嘅筆者睇到目瞪口呆。之前Donald上節目時Amy佢哋又有無咁瘋狂呢？「我哋都係跟住唱吓歌咁啫，自己舉啲牌支持吓Donald咁，都唔係好瘋狂。不過佢唱到《激光中》呢啲勁歌，我哋都要配合吓嘅……」果然……走寶㖭！
四、五十歲人仲參加歌迷會，都驚俾人話㗎，好在有老公同阿女撐。其實，心態年輕，女人四十都係一支花！