【本報訊】篤信四面佛已三十七年的息影女星狄波拉（拉姑）表示，對四面佛被破壞感到難過，當務之急是盡快重建四面佛。對於多年來都被盛傳曾在四面佛前裸體跳舞還神，拉姑澄清並無此事，她強調只曾於九○年在四面佛前跳過一次泰國傳統舞蹈還神。
「好似係位舞小姐」
拉姑昨日接受商台節目《巴巴閉邊個夠我查篤撐》訪問時稱，前日接獲泰國的朋友通知四面佛被毀，初步得悉需兩個月重建佛像，至於重建所需費用及日後的保安工作則仍未清楚，她將專程往當地跟進事件。
她又澄清從未在四面佛前跳過脫衣舞，其實是另有其人。她說：「好多旅行團話我喺嗰度跳脫衣舞，不過嗰個唔係我，而係一位女士，係早過我去拜，佢好似係一位舞場嘅小姐。」
她指出，「嗰位女士當時不如意，就入去同個菩薩講『如果你保佑我行出去中馬票，我中呢，我就入嚟跳舞畀你睇。』咁佢就真係中咗，中咗佢就堅持要入去跳脫衣舞，當時講緊係一九六幾年，佢哋就圍黑布，但仍然唔准佢跳脫衣舞，不過佢喺入面搞乜嘢就冇人睇過，三十秒度就掹番塊布，咁以後嗰個就變咗我。」
不過，她承認曾跳過一次傳統泰國舞蹈還神，「九○年我坐過輪椅，我起唔到身三個月，我就同個菩薩講『個個都話我跳過舞畀你睇，如果你真係畀我起到身，我就跳舞畀你睇！』後來我好番，我就着泰國傳統服飾同埋喺四面佛代善信跳舞還神嘅女仔一齊跳，我就郁到三分鐘度。」
提及有預言家指今次四面佛被毀是一個不好兆頭，拉姑說：「裝多啲香呀，佢又會保佑大家，大家又會保佑佢！」