繼世貿會議後，今年底在港舉行的世界電信展，又係香港喺國際舞台上顯身手的好機會，而且一定冇韓農示威。雖然呢個電信界國際盛事尚有大半年，但前期的交流活動噚日已拉開序幕。
負責呢個活動嘅工商及科技局副秘書長黎陳芷娟（圖）話，雖然距離電信展仲有大半年時間，現時為止反應相當理想，佔地6.6萬平方米的主辦場館亞洲博覽館已租出80%，預計會有900家參展商，內地已報名的展商有70幾家，展館面積有成1.6萬平方米。
今次係首次喺日內瓦以外地方舉行的世界電訊展，揀香港，除因為亞洲及中國嘅電信市場發展迅速外，佢話港府提供好多創造商機的服務亦係贏得美人歸嘅原因。
例如噚日率先舉辦的商務促進活動論壇，就係世界電信展創新的環節；電信展期間，港府仲會安排出席者前往國內參觀有興趣的電信企業，加深雙互的認識，發揮香港作為中國同國際之間嘅橋樑。