趙飛雲近期炒股仔好似炒得好積極，但讀者如果睇真啲，都會發覺成個投資組合的現金比重經常高逾7成，原因當然係對大市有戒心。有睇上周六本欄所寫的「港股下周有暗湧」的讀者，會更加明白趙飛雲點諗。
恒指料下試15200
前個星期全世界睇淡時，大戶突然轉軚挾淡，到今個星期大部份人信心恢復睇好時，大戶昨日午市悄然出擊，在期指急挫帶動下，恒指大跌279點，令短期技術走勢再度轉淡。
假如外圍美、日股市確認短期見頂及展開調整，恒指未來幾日下試橫行區底部15200水平的機會相當大，手上有貨可考慮先行減磅，手上無貨想博反彈，不妨稍等。
趙飛雲昨日以平均價0.48元沽出麗豐（1125）止蝕，因預期有機會在0.44元附近撈番，先作靈活走位。至於百威（718），大市未跌前已出現回吐。由於前日已沽一半獲利作為墊底，而現時持貨仍有利潤，所以繼續持有，希望呢隻基金股稍後有好消息跟尾。
百仕達（1168）昨日午市跟隨大市調整，微穿2.575元收市，但由於已沽出麗豐，倉內持貨不足20萬，而百仕達10日線支持已上移近2.50元，可作為新的止蝕位，持有再觀望多一陣。
收市後，百仕達公布派發特別中期息，每10股百仕達派發5股威華達（622）。這次送股目的主要將集團業務架構重組，威華達將變為百仕達的聯營公司，資產負債表不再綜合在百仕達的財務報表內，令百仕達的負債比率大降及業務定位更清晰，此舉理應對百仕達有利，後市走勢可看高一線。
趙飛雲