呢兩晚電腦男打《FFXII》相當之順利，幾個SubMission都可自行解決，劇情又漸入高潮，本來心情都幾靚，點知表妹阿Da打嚟，話俾人激親，要向我申冤！
事緣佢過年時買咗諾記部番梘王6111，換咗機梗係想出街威吓啦，點知用唔夠兩個禮拜，部機識得自動Off，MissCall都唔知！表妹梗係嗱嗱聲上諾記個CS（CustomerService）度搞啦，第一個答覆居然話要換底板，唔係咁大鑊呀？新機嚟嘅喎！好啦，擾攘咗幾日，卒之攞番部機，點知唔夠一個禮拜又嚟AutoOff！真係谷氣到爆，如是者又擾攘一大輪先攞番部機，玩嘢呀？居然壞第三次！又要我上CS排餐死？係咪每個禮拜上諾記CS，成為放假指定節目先?!
咁離譜，難怪我表妹咁動氣，卒之要用一條LV手機繩先「呵」番佢。查實電腦男都遇過類似情況，每當你氣沖沖走上CS時，個接待員一定面露淡定之色、毫無歉意咁應對，彷彿想講：「整咗三次咋？咁小事都咁勞嘈！」
3月23日
心情：谷氣