澳洲基金正分拆出售嘅淺水灣道五十六號，由○四年開始賣，到𠵱家終於接近尾聲，呢五十三個複式豪宅，件件價值過半億，要去晒貨都好有難度，好彩個盤位置夠靚，加上業主耐唔耐做吓大型宣傳，保持知名度。
淺水灣道五十六號過去半個月賣咗八個複式，總值四億半，𠵱家剩番六個，以現時進度同走勢，要清貨應該唔難，不過宣傳攻勢一啲都冇鬆懈，上次邀請大美人關之琳親臨示範單位，主持開幕儀式，今次更加落本，今晚出街嘅全新一輯電視廣告，請咗紅歌星陳奕迅唱主題曲“FirstofMay”，聽講陳奕迅都係第一次為樓盤唱主題曲。兩次大型宣傳分別用靚人同靚聲造勢，襯起個盤。
澳洲基金喺○一年以十六億，平均呎價九千蚊，向信和買入淺水灣道五十六號豪宅收租，○四年開始拆售，𠵱家已經賣出九成，估計賣晒可套現三十億，升值接近一倍，咁好賺，落啲本宣傳又點話。