高潮是甚麼？像是做愛時的快樂指標，帶點神秘，總讓人有躍躍欲試的衝動。對於高潮，男性來得直接得多；女性，有人可以一直都有性但冇快感，有人要靠打野戰、靠自己手淫才能達致高潮。但有醫生說，性，唔係生活必需品，冇高潮一樣可以生活。女性想有高潮，唔係只靠G點，係要靠二人的戀愛關係、安全的環境。三位靚女Model的經驗，就完全印證了醫生的說法。
記者：李淑芬
攝影：伍慶泉、譚盈傑
B：Bianca
P：Pheobe
C：Cat
記：記者
一定要有愛
記：有人喜歡刺激的性關係，覺得這樣才有快感。
C：我一定要有愛㗎。
B：睇吓邊種人，我識有啲人一定要有愛，亦識得有朋友鍾意玩onenightstand，落蘭桂坊搵男人，然後過完一晚就算，唔會有手尾。
C：我覺得嗰啲人唔會有愛，只係鍾意新鮮的感覺。
P：我覺得一定要鍾意，冇Feel唔得。
野戰未必個個受
記：性交嘅時候，點樣你哋先至會覺得開心？
B：我有個Friend鍾意在公園做，覺得嗰種怕被發現嘅驚恐感覺很開心。我就覺得好似趕住趕住咁，又驚被人見到，又好冇安全感。我好在乎感覺，感覺開心同舒服就OK；要好有安全感，我唔可以喺污糟嘅地方做，好似落Disco，有啲人會喺廁所內做，但咁污糟，又有嘔吐物，我見到都想嘔，點可以喺嗰啲地方做呢。
P：我就一定要喺自己或者對方屋企，或者酒店都OK囉。公園之類嘅地方就真係唔得。有次試過去龍翔道，見到有三架車喺到震，我突然間覺得好嬲，做乜嘢啫，要做咪返屋企做囉。（點解咁嬲？）好煩好騷擾囉，屋企冇床咩，好無聊囉！
B：我試過去元朗天水圍入面，有個山頭，都唔記得叫乜名，夜晚揸車入去，有架車泊咗喺樹旁，睇到架車起勢郁，嘩！使唔使呀！
睇鹹碟會唔專注
C：我覺得一定要有前奏，話嚟就嚟，感覺像例行公事，你想做就做，唔理我感受，一定唔得囉。（前奏要做乜先至開心先？）摸我囉，摸全身都好開心㗎喇。
P：個男人硬來，一腳伸開佢啦。
C：硬來，有啲強姦嘅感覺。唔通同人講，我噚晚俾我老公強姦咩，哈哈哈！
B：男人唔可以粗魯，要好溫柔，同埋要好錫我。
C：我男朋友同我講，男仔高潮要有三樣嘢，聽覺、視覺同感覺；視覺可能係睇緊女仔呀鹹碟呀，聽覺就係呻吟，感覺就係自己身體的感覺。
記：女仔呢？
C：一路搞一路睇鹹碟會好似分咗心咁嘅喎。
B：究竟係望緊我定係佢呢？
C：都唔知佢會唔會將我當係電視入面個女人。
扮高潮？男人實分到
記：你哋覺唔覺得女仔有需要扮高潮？會唔會為咗𠱁男朋友開心而扮？
P：有次睇到個台灣遊戲節目，有個女人講，你知唔知做女人好辛苦，又要湊仔、又要煮飯、又要執屋，必要時仲要扮高潮。超搞笑！
C：如果男仔想女仔有高潮，都應該問一問個女仔要點配合。有啲男仔可能只想滿足自己。
P：我覺得唔需要扮，扮一定唔似嘅喎，啲男仔實分得出真定假嘅喎。
記：有冇試過得不到滿足而需要手淫？
B&P&C：冇喎！
B：通常都算數㗎喇！轉個頭我又可能已經做緊第二樣嘢，或者瞓咗覺。
記：有冇聽過潮吹？
B&P&C：有呀！睇四仔都有睇過。
B：聽男仔講，好似話係要個女人分泌好多先至會有，唔係個個女仔都得，我就冇試過咁樣囉。我覺得呢樣嘢好恐怖呀，我就唔想試嘞。
C：我都冇試過，但就覺得好似過份咗。睇碟時，覺得好似個個日本妹都可以咁樣嘅。
P：我冇諗過想試。不過當我好興奮嘅時候，好想男朋友可以攬住我。
高潮時，我會全身肌肉有少少繃緊囉，但又唔係好激烈，同埋有舒服的感覺；不過最重要都係男朋友做完後可以攬吓我，我會更開心。
高潮蛋糕上的Icing
家庭醫生關嘉美認為，性愛中的高潮只不過是蛋糕上的糖霜，「高潮咪就係你會feelhigh、feelgood、feelhappyaboutit。高潮是否必須？No！有些人沒有高潮同樣可以生活，高潮只是icingontopofapieceofcake。
「高潮是由前腦控制的一種感覺，是情慾感情，是高層次的，是牽涉到思考的，不是只靠性玩具便可達到。」關醫生所謂的高層次，其實是指伴侶之間的關係。一段好的關係，才會讓女性容易達致高潮。這段關係要牽涉到兩個人的坦誠相對、承諾、互相遷就、互相扶持、溝通、志趣。「男性的高潮是來得instinct（本能）一點，女方就會比較sensitive（感性）。」
女性憑感覺達高潮
「就好像有一個case，女方會問：『我與男朋友一起多年，他一直覺得冇問題，但我一直都沒有快感，是否我有問題？』其實這正正是兩性的分別，男性的快感是很instinct，女性好憑感覺。男朋友粗枝大葉，令女方缺乏親密感覺，所以在做愛時得不到快感。再探究下去，可能最後會發覺雙方關係有問題。」
但若雙方都深愛對方，也不能達致快感，又如何處理？「有專家教人掂吓G點呀，乜點呀，其實是錯的。要如何達致高潮，是因人而異的，所以要雙方一同研究方法。」例如醫生會問他們拍拖聽甚麼音樂，可在家中播放搞搞氣氛。
一夜情 是驚恐不是快感
有些人可能要透過某些渠道才能達致高潮快感，例如SM、onenightstand，關醫生認為這是感覺錯認，「要古靈精怪才會覺得high，例如要在驚恐、危險的環境中才感到快感，他們只是將自己的感覺錯誤確認，以為驚恐便是快感，這些已是偏離正路。能夠達到真正的高潮，其實是需要身體狀況良好、雙方感情要好，以及環境舒適安全。」
潮吹拍戲至咁誇張
ReneaLKF治療中心臨床催眠治療師招伊尹指出，女性高潮的生理反應因人而異，有人會是全身肌肉繃緊，心跳加速，呼吸性急速，陰道收緊，陰道分泌增多，這感覺可維持數秒至3分鐘。至於AV碟上所謂的潮吹（女性有大量陰道分泌），都係因應拍戲要誇張，現實中未必可以出現。她強調：「不應追求媒介鼓吹的所謂的高潮，這樣會形成壓力，影響性觀念，反而變得不能享受性愛的過程。」
製造戀愛氣氛
根據關嘉美醫生的建議，讓家裏氣氛和諧，可讓女方更感受到男方的體貼。
香薰調情
不同香薰有不同功效，用有助舒緩神經的，茉莉和玫瑰就有催情作用，說到底，最重要是你們都愛那股芳香。
撫摸貼士
塗上按摩油，減少皮膚的摩擦力，可以讓撫摸更順滑流暢。撫摸及輕觸都要有技巧，以指尖輕輕力在皮膚上碰觸，是羽毛式按摩；維持相同手勢，在皮膚上螺旋移動也可以，這些似有還無的輕撫，可以提高對方的興致。輕柔地撫摸女性身體敏感位置，好像是帶點確認肯定對方的身體，很有效的，這些位置包括手肘內側、大腿。
聽音樂
每對情侶都會有自己的主題曲，播放這些歌，可以讓女方更能感受戀愛感覺，這樣的前奏更貼心。
