出大角嘴搵食已經唔再係新鮮事，不過嚟嚟去去都係豬骨煲、蟹粥，你唔悶我都開始悶！最近，名震荃灣街市的威記川菜正式進駐大角嘴，賣的是聽見都喊怕的毛血旺、老干媽黃喉等正宗川菜，最重要係開至凌晨兩點，啱晒夜鬼一族，坦白講，夜媽媽貢出街食辣菜消夜，夠晒新奇刺激，分分鐘過癮過你睇《輪迴》。
記者：陳慧茵
攝影：譚盈傑
模特兒：Peggy、Cat@Salvador
大鬧鐵樹街
喪膽美食夠薑嚟試
a.老干媽黃喉$48
名字夠嚇，其實老干媽是著名的風味豆豉醬，黃喉即牛心椗，口感爽滑，配香辣的老干媽醬特別惹味醒胃。
b.陳麻婆豆腐$36
有古講：傳說來自四川的陳麻婆當年以別人吃剩的豆腐加工，人人食後讚好，所以正宗的麻婆豆腐應該加姓陳；正宗食法加入花椒同煮，帶麻辣香，送飯必嗌。
c.毛血旺$38
本地少見的重慶名菜，豬紅、黃鱔、牛柏葉、芽菜等共冶一爐，配以辣椒薑葱爆起的紅油浸泡同食，豬紅盡收醬汁精華，芽菜吸味後勁辣，記緊量力而為。
d.椒鹽小金花$28
威哥自創菜式，秀珍菇前後炸兩次迫走油份，面層乾身不會油淋淋，簡單以椒鹽灑面已足以令人食不停口，每枱必叫。
e.粉蒸排骨$48
少辣菜式，以四川蒸肉粉醃製，味道香口，有點吃五香肉丁的感覺。
f.水煮田雞$48
食四川菜必有水煮菜式，除大魚牛肉等例牌貨外，這裏還有少見的田雞；田雞為即日鮮，入口鮮嫩滑溜，配水煮更能帶出田雞鮮味。
巴蜀鯉魚$68至$98（視乎當日鯉魚斤両）
由四川名菜豆瓣鯉魚演變而來，賣點是連魚鱗食；魚鱗炸香後具嚼頭，食時記緊搜括浸於醬汁內的魚春，既鮮濃又刺激。
隱秘地踎店重出江湖
記性好的川菜迷對「威記」應該不會陌生，那間隱身在荃灣香車街街市的川粵小館想當年晚晚爆場，誰知上年年中忽然結業，一眾「威迷」牽腸掛肚，原來最近威哥已重出江湖，新舖選址在出名卧虎藏龍的大角嘴，更名「川味港」。「最衰自己平時少問客攞卡片，租約期滿後，好多舊客都唔知我搬咗新舖。」老闆兼大廚威哥17歲入行，行年31，年紀不大但來頭不小，早年曾於嘉湖海逸酒店跟四川師傅學做川菜，師傅為地道四川人（現已退休），所以威哥學到的都是最正宗的川菜功架；當年一味宮廷富貴魚已令老饕食過翻尋味，出名嗜辣的2R、Yumiko等都是捧場客。
直撥手提親力親為
一直認為食川菜環境太四正反而不自在，地踎檔格局，邊抹汗邊喝着大啤才叫過足癮；川味港舖面細細，晚市熱鬧時橫街坐滿食客，蔚為奇觀。「客人一坐低，我會問佢哋要大中小邊種辣度，不過你心目中嘅『中辣』同我心目中嘅『中辣』又未必相同喎，所以靠嘅都係經驗，摸熟客人脾性。」小店生存之道威哥清楚得很，「我哋仲做埋粵菜，就算同行有朋友唔食得辣都唔會餓親。」為親力親為，威哥新舊舖均不設電話，客人諗起想食乜只需直撥威哥手提，威哥：「留手提包保客人搵到我嘛，諗起想食乜就預先打嚟，就算麻辣火鍋都無問題！」坦白講勁有Heart，唔知以為自己幫襯緊私房菜！
*食客有Say
川味港（98135761）
地址：大角嘴鐵樹街46號地下
營業時間：6:00pm-2:00am
座位：30個
