睇足球直播，國際米蘭對拉素，現場氣氛甚平淡，好多位冇人坐，意大利球迷去咗邊？同一時間睇利物浦對紐卡素，全場爆棚，歡呼聲、噓聲、歌聲此起彼來，睇波睇到如此場面，有乜辦法唔熱血沸騰！英格蘭球迷咁興奮，唔怪得英超聯受全世界歡迎，相反，意大利球迷冇厘神氣，我哋諗唔到意大利足球點可以持續興旺。
國際米蘭件主場球衣係黑直間條深藍色衫，係球迷都認得，今次見到呢件球衣印上贊助商名字，竟然全部係中文字——倍耐力輪胎——左丁山都係第一次聽聞呢個招牌，但不禁疑惑，意大利人睇電視直播，意大利球迷入場，以至其他國家嘅電視球迷，有幾多人睇得明呢五個中文字呀？睇唔明嘅話，「倍耐力輪胎」又會產生到甚麼宣傳作用？
回心一諗，唔通倍耐力輪胎係特登以中國人為對象，鎖定咗中國市場嚟宣傳？但係國際米蘭每次有比賽，十三億中國人民之中，有幾多個會睇到國米件「倍耐力輪胎」球衣？
中國公司現在銀紙大把，可以去歐洲贊助頂級球會，令中文字名揚世界，民族主義分子與有榮焉。不過咁，南韓三星電子贊助車路士球衣，用嘅係英文SAMSUNG，唔用韓文，十分講求實際，不尚虛榮，你話車路士球衣印上韓文，就認真浪費銀紙咯，「倍耐力輪胎」用錢贊助國際米蘭球衣，點解唔向三星學習其中竅妙呢？國米方面，收完錢亦無額外得益，件球衣印上中文字，難賣啲喎！一位球迷對左丁山講：「倍耐力會唔會係Pirelli嘅譯名呀？國米球衣素來係Pirelli贊助嘅喎。」諗真吓，又係噃，Pirelli即係「倍耐力」意大利輪胎公司，賣廣告竟然玩中文。
一流球隊之中，只有巴塞隆拿堅持傳統，係唔肯接受球衣贊助。去年巴塞一度守不住金錢誘惑，想受北京奧運會贊助，在球衣上寫上「北京二○○八」，但最後唔制，令北京奧運籌委大失所望，如果現代球會有所謂不為五斗米折腰者，巴塞係唯一一個。