恒豐金主席林世榮以前成日話唔會賣佢嗰啲金碧輝煌嘅展品，但勢估唔到最後都係敵唔過金錢嘅誘惑。恒豐金噚日話佢哋以5833.97萬元嘅價錢，將個433千克純金打造嘅黃大仙金像出售，即刻賺咗3300萬元。真係黃大仙保佑！
個買家叫做華光，唔係二郎神，係做黃金買賣同埋珠寶首飾嘅公司。華華查過呢間公司，註冊地址喺荃灣，得兩個股東，揸住成80%股權嘅大股東叫做王如寶，另一名揸住20%嘅小股東就叫做李容玉，就咁聽落去都好鬼珠寶Feel！
雖然林世榮將真金黃大仙賣咗，但係各位善信唔使擔心冇得拜，因為恒豐金會以每年408.38萬元租番個金身，為期三年，以確保展覽場有大仙普照；林老闆重有個優先購買權，唔知最後黃大仙會唔會番嚟呢？