早排電腦男同朋友行街街，喺旺角Game舖門口見到XBOX360做示範，用上三星高解像靚芒播緊隻《GhostRecon》，嘩！真係不得了，高清輸出配靚芒已經嚇死人，隻Game嘅畫面同多邊形運算，簡直到咗史上最高境界，情不自禁下同友人駐足觀看咗成半粒鐘，當然周圍亦企滿好奇人士。友人更誇下海口，要喺三月牛一之時，獲得女伴首肯出機！
返到公司，同頂頭老闆傾開，原來佢兩公婆都睇中四月出嘅《N3》，捨得為佢而買部XBOX360。電腦男老闆都屬機迷一族，三國鼎立中義無反顧支持任天堂，第二係索記PS2，今次一反常態捧咪記，原來對PS3嘅Blu-ray冇信心！電腦男本身長捧索記，加上SonyPicture不斷收購及拉攏各大電影公司，照計推動Blu-ray事半功倍。但諗深一層，Blu-ray及PS3開發成本實在太巨大，外國網站評估每部PS3成本要成千蚊美金，推出時肯定蝕住賣；另一邊廂微軟又靠Windows力谷HDDVD制式，真係腹背受敵。上次大敗XBOX勝在經驗及文化搭夠，今次鬥錢多又幾時及得上微軟吖！
3月21日
心情：擔憂