領匯股價長升長有，但班炒家講嚟講去都係攞住一個信念去炒，就係對沖基金會推翻領匯管理層，到時領匯旗下嘅商場管理就會好到同私人發展商一樣，租金自然亦可以同私人商場睇齊。
查實領匯「睇」嘅場都唔算好差吖，起碼賣納米衫出名嘅U-Right就好捧場嘞。噚日佑威國際宣布，一口氣租咗領匯旗下15個商舖，連埋之前租嗰兩個舖，合共有17間分店都開喺領匯旗下嘅商場。等新租嗰15間分店開埋，佑威喺香港總共有38間分店，差唔多有一半喺領匯嘅商場度，可知佢幾捧場。佑威主席梁鄂仲話，佢哋係第一批同領匯簽一籃子租務合約嘅公司，皆因領匯租金合理，租有所值，除底租亦會加收分成租金，跟貼市場脈搏。
查實個租客讚到個業主咁，領匯投資者應該開心定擔心呢！