樓價連升三年，累積升幅唔細，好多人都話貴到買唔落手，但若果用千零蚊呎，居屋嘅價錢就買到私樓，大家又點睇呢？
粉嶺聯興街三號育隆大廈，由私人投資者持有嘅半幢，𠵱家放售，呎價一千五百四十四至一千七百三十七蚊。物業屬單幢樓，高五層，仲有𨋢；每層兩伙，面積一律五百一十八呎，一房設計，實用率近八成。
大廈喺九九年落成，樓齡七年，呢個私人投資者向發展商買入半幢五伙B單位收租，𠵱家改為放售。除一樓連平台單位賣九十萬外，其餘劃一價八十萬。
獨家代理中原地產高級分區經理歐偉基表示，單位月租可達四千元，買家回報有五至六厘。佢補充，賣價只屬市價。
睇番同區啲單幢樓，呎價都係咁上下。好似喺樓盤隔籬，由兩座住宅組成嘅嘉宏中心，十四年樓，舊年五月A座四樓B室以六十四萬易手，面積四百七十二呎，呎價一千三百五十六。而行遠少少嘅單幢樓嘉和軒，一樓C室連平台，七百九十二呎，舊年六月以一百五十萬售出，呎價一千八百九十四。