「工欲善其事，必先利其器」就算你用點名貴點多功能嘅化妝品，如果唔識配合優質的化妝掃，甚至仲未分得清邊支掃打邊支的話，你所化出嚟嘅妝可能靚極有限。根據專業化妝師所講，眾多化妝掃中，有4支讓你搖身成為索女的必用法寶，有佢個妝自然靚到人見人冧！
記者：盧家蕙
攝影：黃子偉
Model：Fiona@Salvador
MakeupArtist：Meegan@MAEVON（21997744）
纖維動物毛各有好處
面對一大堆唔同形狀嘅化妝掃，你會唔會覺得頭痕呢？先講質料，化妝掃主要以動物毛或纖維製成，纖維和動物毛軟硬不同，適用於不同的化妝掃，可以話各有特色。動物毛有羊毛、松鼠毛、馬毛、貂鼠毛等，價錢由幾蚊支至600幾蚊都有！分別雖大，但使用方法都係一樣！
多掃=無用
聽化妝師Meegan講，單係眼影掃也可分為眼尾、眼頭、眼窩、眼摺位等6種，究竟有無必要用咁多呢？「其實化妝師先會用到咁多支眼影掃，因為要上鏡、出Show，妝容愈仔細愈無瑕，就愈顯出化妝師技高一籌！不過講到自用，平時出街絕對無需要，畀十幾支你都用唔着啦！」既然無必要買晒成堆化妝掃，Meegan欽點四支靚女MustHave的化妝掃，讓你行走江湖。
MustHave1
營造均勻膚色 蜜粉掃
掃頭特徵：大而闊的圓球形，多用長而柔軟的纖維或動物毛。
用喺邊：全塊面均可
有乜好：可靈活沾取碎粉，掃上面時可順着面形展開，搽得夠均勻，即使重手咗都唔怕好似用粉撲咁變咗白面人。
MustHave2
可愛緋紅臉頰胭脂掃
掃頭特徵：中圓拱扇形，以混合動物毛為主
用喺邊：顴骨凹凸位
有乜好：膏狀胭脂可以用手指搽，粉狀就一定要用掃，咁先可以塑造色澤柔和自然的緋紅臉頰。
MustHave3
漸變效果必備 眼影掃
掃頭特徵：掃毛較短及鬆軟，以柔軟的動物毛為主。
用喺邊：雙眼皮及眼窩位置
有乜好：手指上眼影雖然比較出色，但要營造立體感或者玩多色及漸變效果，要靠眼影掃了。
MustHave4
炮製無痕肌膚 遮暇掃
掃頭特徵：小型、幼身而略帶扁平，多是合成纖維。
用喺邊：遮蓋黑眼圈、眼袋及一些面部瑕疵
有乜好：手指嘅熱力會將遮瑕膏溶化，無論是水狀、乳液或膏狀的遮瑕膏均需用掃掃上，最後以手指壓上邊位，感覺會更Smooth及自然。
其他上妝百寶
睇完四支必掃後，若想個妝化得更靚更立體的話，不妨睇睇自己的需要，自行添置各款化妝掃。
面部
濕粉底掃更貼更薄
掃頭特徵：濃密扁身配幼細的掃頂，多以纖維製成。
有乜好：手指雖可以上濕粉，不過用掃會更貼面，避免出現左右面厚薄不均。
陰影掃 突出輪廓
掃頭特徵：平或斜腳濃密大掃，多為動物毛。
有乜好：用在面腮骨、T字位等，可突出面部輪廓。長面人打上額及下巴位；方面人打起角位；圓面人打顴骨凹入位置。
眼部
眉掃 勾畫細緻眉形
掃頭特徵：扁平斜腳細掃，纖維或動物毛皆有。
有乜用：可在眉骨位隨意勾畫出幼細線條，而掃的起角位可填窿位，及重新畫上完美的眉形。
唇部
唇掃 完美唇形
掃頭特徵：扁平細掃，以柔軟而富彈性的毛製成。
有乜好：可勾畫出完美清晰的唇線，適用於塗抹唇膏及唇彩。
靚女都想知
Regina
我屋企得碎粉同胭脂掃，其他化妝掃都係連產品贈送，自己冇用開，咁多款掃其實我都唔識分。
Karen
我只係識分幾支囉，見有啲斜身的掃頭我真係唔知係乜兼點用。
Dancer
我想知MustBuy邊幾支掃，因為太多了，而且都幾貴吓，點揀先？
掃都要沖涼
第一次用化妝掃前，應先用暖水把掃頭的蠟溶化，之後平放並風乾。化妝掃宜每隔三個星期清潔一次，可使用專用洗掃水或Gel，徹底清潔殘留物外，還具消毒及護理作用。
化妝掃千祈不要用風筒吹乾、拉扯，自然風乾即可。
（a）Smashbox（21183614）
（b）BobbiBrown（22658928）
（c）KesalanPatharan（KP）（23779449）
（d）shuuemura（25064283）
（e）LauraMercier（21150687）
（f）CLINIQUE（31881112）
