寶哥哥李國寶嘅生日都過咗成個禮拜，慶祝party都應該玩得八八九九，但係噚日喺東亞嘅記者會上，寶哥哥對住鏡頭，都依然忍唔住瞌眼瞓。
其實，佢老哥經常喺立法會釣魚，大家都見怪不怪，不過你以為佢唔夠瞓就反應慢，咁就錯晒。話說噚日喺東亞嘅電子網絡銀行簡布會度，寶哥哥個馬仔李繼昌（總經理兼投資銀行處主管）提到佢哋下個月會開三間證券服務中心，想大搞股票買賣生意。當記者問到東亞全年諗住開幾多間時，佢就將個波拋畀老闆：「老闆個數開得幾大喎。」
寶哥哥即刻好鬼馬咁話：「你哋到時就會知。」耍走晒班記者，轉數都好高。佢隻東亞噚日就冇瞌眼瞓，升咗六毫半，派完成績表之後係咁升，大股東當然最開心。