一向敢言的名導演杜琪峯前晚出席香港影視娛樂博覽開幕禮後，力斥這只是一個粉飾太平的撐場會，完全沒誠意推動電影工業。阿杜批評貿發局不應將電影新一代演員如古天樂、楊千嬅和吳彥祖等當作布景板，只懂褒獎已在國際成名的梁朝偉、張曼玉、徐克和他本人，令活動變得毫無意義。
政府為了要推動香港電影工業，由去年開始以香港貿易發展局名義在港舉辦香港影視娛樂博覽，今年已是第二屆，每年政府都花費過千萬元來主辦。在前晚舉行的開幕禮，行政長官曾蔭權、民政事務局局長何志平與貿易發展局主席吳光正亦有出席，可見政府相當重視這個盛會，而電影界的精英代表張曼玉（Maggie）、梁朝偉、楊千嬅、梁家輝、張學友、吳彥祖、陳果、陳可辛、徐克與杜琪峯等亦應邀出席，但大會只集中表揚在國際成名的巨星與導演，似乎對推動香港電影工業毫無幫助。
演員冇癮
出席只做布景板
前晚杜琪峯雖然與偉仔、徐克和Maggie同時獲大會表揚，有份上台拿我最欣賞的華人導演獎，而偉仔與Maggie則獲頒星魅非凡男、女演員，但其他到場紅星除少數歌星有份上台表演外，其他演員拍了一張大合照後，大會完全沒有作任何推廣，他們的出席變得可有可無。
阿杜認為此現象對新一代演員或幕後精英不太尊重，他前晚說：「政府花咁大嚿錢搞個騷出嚟，同時又請晒全世界嘅片商嚟香港參加，喺咁好嘅機會，點解唔介紹吓新一輩導演同演員俾外國片商同傳媒認識，只係識得褒獎我、徐克、偉仔同Maggie，咁做意義係唔大，因為我哋喺海外已經有人識，褒獎我哋只不過係錦上添花，政府如果真係有心幫電影業，應該努力幫助推動新嗰輩演員如古仔、吳彥祖同千嬅呢一輩走出香港先至啱。」
後起之秀
幫助新導演上位
近年Maggie已甚少在港拍片，阿杜認為主力在港影壇作努力的反而是新一代演員，他們才是香港影壇的未來，阿杜有感而發說：「我哋呢啲係老啦，將來香港影壇要持續光輝燦爛，真係靠班後生嘅撐落去，但大會當呢班新一輩演員係布景板，我喺台上面睇到係好難受，覺得今晚似做騷多過係推動電影工業。如果政府真係有心去幫忙，希望出年可以諗番啲實際有意義嘅嘢，我相信政府可能係有心去幫影壇，但政府好明顯係用錯方法。」
阿杜強調自己只是愛之深、責之切，他說：「我點解堅持留喺香港拍戲，係因為我熱愛呢個城市，對香港電影圈有好深感情，但香港影壇要世世代代興旺落去，大家一定要畀新一代撐起嚟，咁先會有希望。近年我已經好努力幫助一啲新導演上位，亦會起用更多唔同類型演員，咁做先係培育下一代嘅最好方法。」
誤導老外
香港唔止兩粒星
此外，前晚有份出席影視娛樂博覽開幕禮的吳君如，昨日凌晨在商台主持節目時談到偉仔和Maggie獲獎，君如說：「我覺得張曼玉上去係好真情流露，佢話當我哋出一個明星又踩低一個，講嘅時候有啲激動。但係啲西人嚟我哋博覽會，會問：『吓，乜你哋香港得呢兩個明星㗎咋？』」
採訪：陳月媚
攝影：陳慧安
