曾志偉投資三千萬、標榜極速剪髮嘅連鎖髮型屋ECHouse，舊年二月喺奧海城開第一間店舖後，陸續喺港九新界以特許經營方式再開多九間分店，但噚日讀者歐先生向本報投訴，話喺志偉呢間公司度投資咗三十萬，喺紅磡火車站開設ECHouse分店，結果蝕到血本無歸，月前仲執咗笠㖭。
「返港時了解吓」
歐先生話：「我哋舊年十月透過一間叫EarnsonManagementLtd嘅公司簽約，大家各佔百分之五十股份，點知經營咗兩個月蝕得好厲害，我哋諗住退股。合約年期訂明三年，如果三年內退股，我哋唔可以攞番裝修費、器材費同七萬五千蚊嘅特許經營費，但就可以攞番三個月租金同水電預繳費用，點知呢間Earnson突然執笠，原本佢哋經營開嗰六間有錢賺嘅髮型屋，突然轉晒去另一間新公司度，我哋都唔知點追番啲錢。」
馮仁昭問番志偉呢單嘢，佢話：「間公司係我同一個日本朋友投資，我知有幾間舖因為租貴執咗，但詳情唔係太清楚，我𠵱家喺廣州，等我返香港時了解吓。」