地產代理同發展商關係密切，每當發展商有樓賣，代理都好識做幫手做勢。新地嘅大角嘴君滙港重推，幾大代理行都排住隊搞活動。香港置業噚日就喺隔籬奧海城商場一期開咗個「君滙港資訊旗艦店」，搵埋新地代理執行董事周國賢做主禮嘉賓。
港置執行董事李志成表示，公司三月初成立「君滙港聯盟」，出動九龍區五百個前線積極拉客，接獲逾八百個查詢，當中三百個仲預約面談同睇示範單位。𠵱家經港置買君滙港，仲有美食宴送，名額三個，總值二萬八千八。
而港置董事姚偉南就做咗啲客戶分析，指準買家主要係換樓客，唔少係三十歲左右嘅專業人士。睇樓客中，四成半住九龍、三成半嚟自新界，其餘係香港區客。
佢話，睇番同區嘅奧運站樓盤，一般租金回報約五厘，所以君滙港都吸引唔少投資者捧場。