俄羅斯總統普京神州遊，一定有好多嘢傾，傾啲乜當然要睇吓兩國有啲乜嘢煩。大家都知祖國政府呢期煩兩樣嘢。第一、保障國家安全，特別在祖國為統一出力時，防範海上封鎖對國家的威脅。第二、就係用經濟增長去維持國家平穩安定。而俄羅斯政府呢一期煩緊啲乜，一定係國家存亡，特別想加強對鄰國的影響力。所以，今次好多人話會談會用能源掛帥，孫柏文亦同意。點解能源問題係祖國同埋俄羅斯嘅利益呢？等孫柏文慢慢解釋。
首先講祖國。在國家安全政策，我隻金手指都已經在幾個禮拜前，為大家篤爆過祖國面對海上封鎖嘅威脅。祖國有八成石油靠進口，要經過馬六甲海峽，而馬六甲海峽就係東南亞李光耀Inc.揸Fit。李光耀Inc.話啲貨唔畀過就無得過，而李光耀Inc.新領導人顯龍總理，臨出任總理職位時最後一次遊埠嘅地方就係台灣。所以有一個陸路能源供應渠道就好得多嘞。
再講祖國經濟增長，大家都知，經濟活動需要能源，所以俄羅斯石油同天然氣對祖國嘅重要性，都唔需要孫柏文多講。現時中東賣石油畀祖國㩒住搶，如果知道你係黃皮膚買家，就要平均每桶石油畀多US$4。因為唔同啲歐洲及花旗佬咁樣可以幫襯非洲同埋南美洲石油，東亞地區因為實在太遠一定要幫襯中東油。所以如果祖國可以喺鄰國直接入口石油，咁就平得多。
陸路入口石油最方便嘅方法，就係直接起一條油管到祖國。原本俄羅斯石油公司尤科斯，就係想直接起一條油管到華北大慶，不過後來尤科斯被俄羅斯政府國有化，計劃就告吹。俄羅斯政府唔希望起一條油管賣石油得一個買家，而係希望一條油管賣石油畀多個買家，所以油管終點唔可以係大慶，要係俄羅斯太平洋海岸。不過，因地理問題，造價太貴，𠵱家都仲未有人願意去起。孫柏文在大約兩年前，有機會同當時仲係普京經濟顧問去劈酒，我趁住佢會酒後吐真言，便問下關於油管嘅事。
佢話，油管一搵到有人出錢便會起，仲要一定喺俄羅斯太平洋海岸做終點。不過，一定會有支線到大慶。唯一擔心係，如果有兩個終點，附近的油田未必夠油畀咁多個買家。所以最終條油管係乜嘢樣，就連孫柏文隻金手指都唔知。可能會有驚喜。聽日，孫柏文隻金手指就篤下俄羅斯想點。
孫柏文