平日好食懶做嘅「妹妹」，為食貢足幾日狗Cafe，可以話係資深客，但甫進壹樓狗室，依然被嚇窒：「嘩！咁多人嘅？咁多狗嘅？」呢度雖則地方細細，但就勝在狗流暢旺，狗仔仲任攬任抱，PR犬一職勝任有餘。「妹妹」上去搵食當日，就遇到另一隻「MuiMui」──身懷絕技嘅松鼠狗，佢識Sit識Hand識Over……濕碎啦！最犀飛利係佢識跳高凌空翻騰轉身，真係好睇過《人生馬戲團》！
除咗多世外高狗外，呢度嘅另一賣點係招牌菜「狗仔Pizza」，賣相一啲都唔覺得係狗仔食品，士多啤梨配上青豆、粟米作為Pizza餡料，再淋芝士上面，Yummy！Yummy！講真人食嘅嘢都未必精緻得過佢。大胃王「妹妹」見到就口水狂流！主人家玩具貴婦狗「寶寶」就老實唔客氣，一埋牙就霸住碟「吞拿魚雞蛋雜菜意粉」係咁擦。不過又唔怪得佢嘅，鬼叫啲狗仔食物又香又好味，正一引死狗！
記者：周樺婷
攝影：譚盈傑
壹樓狗室（61022030）
銅鑼灣百德新街66-72號海灣大廈1樓B室
