正當李家二少澤楷仲未肯定自己同《信報》係咪有緣，佢阿爹個好朋友、同佢口味勁似嘅TOM仔大股東周凱旋，噚日趁住TOM仔派成績表，順便公布「入咗股」《明報》，雖則只2.96%，但勉強都做咗報業女強人，咁TOM仔超人都有份，即係超人𠵱家都係明仔股東。唔知呢個消息，會唔會刺激二少快啲決定同阿信發生關係呢？
周小姐點樣入股明仔？佢將當年用6000萬買嘅《亞洲周刊》50%股權，作價1620萬賣番畀明仔，明仔就發咗1200萬股股份畀周小姐抵償。呢單交易，明仔都好筍啫。
咁點解要賣？同埋係咪周小姐搞本地報紙？佢個頭馬、TOM仔新當家湯美娟就解畫，話一人一半股權對本周刊無乜好處，同埋亦都係TOM仔自己重新調配資源云云，而明仔係一個好好嘅報業集團，所以好放心賣番畀佢，嗰3%明仔股份佢會長揸，遲啲先諗係咪增持，雙方𠵱家探討緊喺「廣面」合作，點「廣面」法？例如明仔喺美加做得咁好，遲吓又話喺祖國出《明周》，咁咪研究吓有乜一齊搞囉！
其實唔使講咁多，本書由2001年3月買番嚟咁耐蝕足咁耐，就算勁如印度神油的超人都無法將佢起死回生，唔係話佢蝕唔起，但係無飛士啫。呢鋪壯士斷臂，仲有得玩埋報紙，如果華華係周小姐同超人，真係即刻斬雞還神兼擺幾圍呢！
李華華
讀者如有任何意見或報料，歡迎發送電郵至[email protected]。
