金鷹商貿（3308）昨日新登場，雖然股價最高見過3.75元，但收3.575元，比起招股價3.15元，只高出13.5％，難免令人有些少失望。因為隻股之前有人唱到好好，話要見4元全無問題。
經紀黃話，據講芬佬分得唔多，而公開配售方面就人人有份，隻股貨源分得太散，變得難炒，或者要等班散戶沽晒出嚟，大戶收夠貨後先至有更佳表現。
奕達長線有信心
另外，經紀黃愛股之一的奕達（2662）將在周四公布中期業績，噚日股價突然急跌7.35％，收3.15元，成交股數941萬股，金額2992萬元，沽壓唔輕。
經紀黃話，隻股新簇簇，首個中期業績冇理由會差，但股價由最低2.05元，升到最高的3.775元，累積升幅相當大，有個別芬佬趁3月底季結前沽貨獲利，其實好正常，唔代表有特別事發生。
佢作為一個長線投資者，依然對隻股好有信心，皆因仲有其他大芬陪佢一齊坐貨。
慕容小初