肥龍喺白加道十五號嘅官邸，佢唔住好浪費，不過，維多利亞宮用嚟宴客就真係好夠派頭。噚日挨晚，許司長同許太太喺翻新過嘅維宮開第三場新春酒會，今次輪到傳媒、教育界、商界同勞工界，成百幾二百人喺草坪摸住杯酒傾偈，人頭湧湧，都幾有氣氛。
大霧籠罩不見西九
噚日大霧，喺維宮望出去，只係見到中銀同國金，西九唔見咗，肥龍語帶雙關話，「西九冇咗，咪冇咗囉！」所謂天有不測之風雲，邊個知西九捲土重來是禍是福呀。
八方問肥龍添馬艦有民主黨支持，今鋪應該掂喇啩，肥龍即刻反應好快咁話，「喂，有條件㗎。」即係唔係surewin，𠵱家做政府係難過港英時好多，政府喺立會冇票，邊個使畀面你？唔怪得許太成日叫肥龍快啲做完就算。
肥龍之友、馬會主席夏佳理唔知係咪想玩佢，同記者輸賭，肥龍同煲呔以及唐唐明年七月之後仲留喺政府，肥龍就死都唔認會留，仲暗示八方唔好信夏主席。
噚晚好多大人物都畀面嚟，小電王米高嘉道理同肥龍密密斟，小小超、吳天海就同肥龍拍合照，城中電訊業嘅揸fit人，好似蘇澤光、王維基都嚟齊；至於教育界就有港大校長徐立之同科大校長朱經武；勞聯嘅李啟明同肥龍好friend，一定捧場啦。
政務司司長宴客，眾高官都嚟幫手招呼賓客，唐唐好遲先到，一見到女主人就行個西式禮擁抱一吓，唐唐話肥龍一定唔會嬲喎，大家咁熟，梗冇問題。肥馬、葉澍堃、阿瑟王、羅范、李淑儀、蔡瑩璧、何宣威以及劉麥懿明都有嚟趁高興。
魚池養十六條錦鯉
「新居入伙」，女主人雖然話唔喺度住，但都應八方哋要求介紹吓新居，大家最有興趣係煲呔個魚池，許太話本來想填平佢，但係覺得好嘥啫，所以就請曾太位魚王幫佢哋買咗十六條普通錦鯉，大小魚池各放八條。許太仲話，原來養魚都好多工夫，啲魚起初好怕人，噚日第一次公開畀外人參觀。
至於間屋嘅傢俬，客廳個屏風係煲呔留低，啲梳化有啲就做咗新椅套，門簾太薄嘅就換咗厚嘅。許太又話，下晝偏廳好靜，又好陽光，最啱睇書；飯廳就全冇改動，只係有張玻璃圓枱太細唔係幾好坐，遲吓會換張新嘅。
咁肥龍唔選擇喺度住，梗係唔會放佢啲心愛Hi-Fi喺度，全屋最特別嘅就係擺咗沙特阿拉伯王送畀佢嘅一座金造紀念品，肥龍大年初一天光一點去接佢機，都應該有獎啦。
爆料熱線：29290000、27860099
報料傳真：26239278
報料電郵：[email protected]
