話說恒豐金業（870）公布，將一尊1萬4千盎斯純金黃大仙像，以5834萬元賣畀華光國際珠寶，然後用每個月現金34萬租番嚟，租約為期三年，不過之後恒豐金有權優先為大仙贖身。鄰居孫兄係金、銀、石油大好友，本來呢單新聞應該由佢嚟分析。不過睇真啲原來唔關金價前景事，所以都係由利世民講吓件事啦！
利世民記得，恒豐金嘅旗艦店金至尊旅遊展覽廳01年落成，資料話當時金價大約每盎斯250美元。到今時今日，恒豐金乜都唔使做就已經淨袋每盎斯300美元，諗落都幾和味！
恒豐金噚日嘅通告話，「純金黃大仙」以每盎斯552.75美元賣出，收益約3300萬元。至於筆錢點用，通告都係講埋啲大路嘢，冇乜特別。利世民依稀記得，恒豐金老闆林世榮年初時都曾經話過，睇金價今年內會升至每盎斯600美元。點解唔等埋嗰一成升幅先賣個「純金黃大仙」？點解仲要畀成7厘「租金利潤」畀華光賺？
利世民小時候聽過一個故事。話有個農夫無意之間執到個神仙袋，袋上嘅說明話︰「凡執得此袋者，可以從袋中一個一個地拿金幣，數目不限。惟得袋者使用金幣前必須將寶袋交予別人，從此不得再沾手寶袋。」農夫攞吓又多啲，攞啊攞，一直都唔捨得將個袋交畀人，結果到最後都冇享受過金幣嘅財富。
雖然話今時今日會計師有煉金術師嘅能耐，可以無中生有創造紙上富貴，不過重新估價呢味嘢創造唔到現金。恒豐金坐擁金山，冇錯係好值錢，不過生意嘅嘢好現實，一日唔落袋，一日都唔真正算有現錢。林老闆聰明過上面故事個農夫，有個辦法可以享受不停升值嘅黃金資產，又唔需要將個神仙袋畀人，仲有現錢使吓。
點做？呢個「刁」可以睇成林老闆將「純金黃大仙」用嚟做抵押，借5834萬，年息7厘。早幾日恒豐金又再簽嗰5億、拆息加0.88厘嘅三年銀團貸款。不過恒豐金邊際盈利率得嗰4厘幾，借7厘錢嚟搞邊科？結果有待歷史分曉。
當然如果日後金價升，水漲船高，金至尊旅遊展覽廳嘅黃金資產一定又再大有斬獲，到時再用市價幫大仙贖身都未遲。最後，孫兄託小弟同大家講，千祈唔好因此以為黃金升勢已盡。
利世民