恒指高低波幅65點，埋單微跌7點。滙控（005）唔見0.50元，拖低恒指18點。滙控今日除息2.40元，假如冇升冇跌，將再拖低86點，即恒指實際會係15836。期指昨收15835，實質低水1點。
有啲統計話，滙控每次除息後，初時跌多過升。今次未必，理由係大市氣氛良好，而滙控預期PE只係12倍啲，睇嚟升多過跌，揸滙控過戶者財息兼收。
中石油C輪2192：中石油（857）派成績表後，市場反應係先跌一跌，其實盤數唔差，只不過有人期望過高，埋單價7.80元，冇升跌。過幾日，8字頭以上機會好大。
買中石油C輪執餐晏仔唔難，短炒向4974埋手，易買易賣。計數炒嘢，注碼又唔係大嘅話，則諗2192，7月初夠鐘，輪價82仙，溢價1.3%，槓桿率9.5倍（有效7.2倍），引伸波幅26.7%。計埋屆滿前正股除息，2192數據都係好靚。
建行C輪9971：國內金融類股票生猛，保險股巴閉啲，銀行股升得慢啲，打打銀行C輪主意可也。建行（939）升3格，成交金額12億，狀態勇猛。
建行C輪9971有得諗，溢價0.7%，槓桿率3.9倍。建行C輪大多數C輪爆炸力普通，槓桿率較低之故。
章盛