梁洛施小時候被母親改了一個發音又長又好聽的英文名：Isabella（伊莎貝拉），結果被同學仔將之改為「耳屎鼻拉」這個核突花名。其實梁洛施童年時候既爛玩又強悍，才五歲已經因為跳橡筋繩跌斷手，八歲那年跳茶几踩爆玻璃，九歲剝牙驚到打醫生，百厭史成籮！
於澳門出生的梁洛施，身高五呎八吋，高妹一名。其實從小她已經高人一等，Isabella說：「阿媽話係發骨節，燒一燒就高一高，我細個唔算多病痛，淨係發燒，𠵱家就成日病。」
踩爆玻璃
Isabella的外表很玉女，斯斯文文，很難想像原來她小時候是個反斗百厭星，隨手拈來已經有大堆難忘趣事，她說：「我細個好爛玩，成個男仔頭咁，經常玩到癲晒，成日都俾阿媽喝。五歲嗰陣玩跳橡筋繩，跳跳吓跳咗落地，右手撳落地下，咁就斷咗，包咗一個禮拜石膏，幾慘呀！」
當Isabella年紀再大一點，就開始學人玩爆玻璃，結果又出事。她笑說：「我記得當年係八歲，有次帶女同學返屋企玩，我哋喺梳化上面跳嚟跳去，跳跳吓跳咗去個茶几上面，踩爆咗玻璃，我哋冇流血呀，淨係好驚囉！又驚阿媽鬧，又驚同學仔以後唔敢上嚟，好彩嗰日媽咪放工返嚟我已經瞓咗覺，所以冇俾佢鬧咋！」
不肯就範
好戲尚在後頭，九歲那年，Isabella要剝牙仔。由於她很怕看牙醫，怎也不肯就範：「我由細到大都好怕整牙，有次去到牙醫診所剝牙，媽咪陪我坐咗好耐，我都唔肯行入去，我連個女醫生都打！媽咪就罰我企喺診所門口，我企咗一日，由天光企到天黑，結果嗰日都係冇剝到！」
採訪：朱倬誼
部份相片提供：梁洛施
