斷臂超人變身拯救專家<br>我未成年：陳鍵鋒爆樽插脈悟前非斷臂超人變身拯救專家
我未成年：陳鍵鋒爆樽插脈悟前非
陳鍵鋒童年時最喜歡扮超人跳上跳落，不時弄得傷痕纍纍，更試過跳梳化時跌斷手，而最嚴重的一次是把玩玻璃樽時出事，被玻璃碎片插傷手腕，當場暈倒。頑皮仔飽嘗皮肉之苦後，升讀中學便接受拯溺、急救及消防等訓練，變身拯救專家。
陳鍵鋒一向予人斯文乖仔之感，但小時候的他卻是個超級反斗星，經常跳上跳落，弄得滿身傷痕。
攀五櫃山
陳鍵鋒說：「我細個嗰陣好曳，記得有次喺奶媽屋企，趁佢煮緊飯嗰陣，我將佢個五桶櫃嘅櫃桶拉開晒出嚟，然後一級一級爬上去，搞到櫃桶啲衫跌晒出嚟，激到奶媽生蝦咁跳。我又鍾意扮超人喺梳化跳嚟跳去，試過一次喺梳化跌落地，跌斷隻手。」
斷手斷腳對小時候的陳鍵鋒而言已算家常便飯，最嚴重一次更是搞到爆樽插脈，嚇得陳鍵鋒半死，他說：「嗰次我攞住個樽fing吓fing吓，唔覺意掟埋牆爆咗，塊玻璃差少少插正脈門，我當場暈咗，要送院急救。」
陳鍵鋒表示這些反斗往事都是讀小學時發生，升上中學後即不再搗蛋，反而愛拯救。他笑說：「唔知點解，讀中學嗰陣我好鍾意參加啲拯救訓練，中三嗰年已經攞到拯溺銅章，又參加RedCross（紅十字會），學急救同輕型拯救，又學消防訓練、獨木舟、野外定向甚至手語，乜嘢救人同求生技能都學勻咁滯！」
採訪：戴彩煥 部份相片提供：陳鍵鋒
《3歲–歌唱冠軍》
「我由三、四歲開始已經參加教會嘅詩歌班，每星期同大班小朋友一齊練歌都幾開心。教會每年都會舉行大型唱歌比賽，對我哋嚟講係一年一度盛事。雖然我攞過獨唱同合唱冠軍，但二家姐攞過校際歌唱比賽冠軍，仲威過我。」
前排左一：陳鍵鋒
《5歲–紙紮公仔》
「呢張相係我五歲左右，喺教會參加表演活動影嘅。教會經常搞活動，我成日俾人捉去參加呢樣參加嗰樣，又唱歌又跳舞。當年啲大人幫我化妝化到成個紙紮公仔咁恐怖，望見張相都驚。」
《12歲–走馬看花》
「呢張相大概係十二歲嗰陣，同爹哋媽咪跟旅行團去桂林騎駱駝嘅相，雖然細個成日跟父母去旅行，好似日本、台灣同泰國咁，但我對去過嘅地方一啲印象都冇，因為次次都係跟團，人哋呢頭帶我去睇某個名勝風景，嗰頭我已經忘記得一乾二淨。」
《16歲–自食其力》
「我十六歲嗰年第一次自己賺夠錢去旅行，當年我做暑期工，喺泳池做救生員，每個月賺成萬蚊，知道家姐姐夫佢哋去印尼玩，我就join埋佢哋。第一次唔同父母去旅行，真係好free！」
《27歲–少年大使》
陳鍵鋒中學時期是校內活躍分子，除學習獨木舟和拯溺外，曾加入紅十字會，學習急救和護理等訓練。長大了更獲委任為紅十字會少年大使，相信他穿起這身制服時應喚起不少回憶。