香港人對特色單位情有獨鍾，所以連平台、天台或者複式等單位，賣價一般都高啲。通常連平台花園嘅單位，個平台只係單位嘅三分一到二分一，大到同單位一樣嘅就比較少見。
西半山堅道金堅大廈，地下A室剛易手，單位約一千方呎，附連嘅平台花園都係同樣大，望士丹頓街，成交價約五百二十萬，呎價五千二，比市價高一成。買家係貪個平台花園夠大，可以當做私家花園之餘，仲有大把地方耍大極。原業主自住十年，因唔夠地方用至放盤，個半月就搵到買家接貨，賺五十萬離場。
利嘉閣分行經理林植培表示，七三年入伙嘅金堅大廈，高二十八層，提供一百五十四伙，只係得四個單位附連平台花園，前後向各兩伙，每伙嘅平台都係同單位一樣大。