最重磅兩隻股份，中移動（941）與滙控（005）帶住個市上，共貢獻恒指71點，包咗恒指全部升幅128點嘅5成半。恒指收15929，距離萬六齊頭關只相差71點，大關之前有獲利回吐，好正常。
滙控明日除息2.42元，拖低恒指86點。計埋呢個因素，期指實際輕微高水7點，而恒指除滙控股息計實際係15843，距離萬六大關又遠咗啲。大市氣氛仍佳，滙控除息後恒指好快升越萬六，藍籌C輪，有平貨唔怕買。
中電信C輪9886：中移動派成績表後連升兩日，共進賬1.35元，由兩周前低位計，則彈升11%（3.90元）。中電信（728）明日份成績表出嚟見人，估計市場會收貨。因為冇乜點升過，業績就算未如人意，亦唔怕重傷。
中電信派成績表，趣趣哋買定啲C輪可也。對象係9886，7月中到期，輪價24.7仙，溢價3.6%，槓桿率11.2倍（有效7倍），引伸波幅30.9%。9796近期成交急增，亦可一併短炒。
新地C輪9869：新地（016）曾經見過80.20元，收79.60元，升0.45元，估計反覆向好。
新地C輪9869收44仙，升得1仙，未夠，短炒有得諗。隻輪5月中夠鐘，溢價1.9%，槓桿率18.1倍（有效13倍），引伸波幅19.8%。
章盛