尋日小小超對傳媒話，收購《信報》要睇緣份。利世民諗起八十年代初鄭國江填詞嘅一首歌《什麼是緣份》，裏面有句歌詞好頂癮︰「凡事不可解釋，就稱做緣份。」
其實收購《信報》只不過兩億幾，對小小超嚟講唔算好貴。不過輿論對呢次收購硬係唔睇好，實在「感情用事」。超人一家篤信佛教，如果次次做生意都咁「隨緣」，相信今時今日收購《信報》都會順利的。始終香港人對緣份既睇法，最主流嘅理解都係個句︰「凡事去得太盡，緣份勢必早盡」！
《信報》嘅最大價值，就係佢哋有金手指嘅神乎奇技，捧出一支又一支健筆。當然最具江湖地位嘅，仍然要數創辦人林氏伉儷同華文財經評論員曹仁超。今時今日資訊爆炸嘅世界，報紙作為一個媒體，最大的功能已經由發放資訊變成篩選資訊，呢種發掘文膽嘅能力就更加重要。《信報》人才薈萃嘅現象，利世民都係個句︰緣份也！
《信報》粉絲嘅擔心，利世民當然絕對明白，不過就唔係好認同。如果小小超只係想買《信報》嘅硬件，兩三億都嫌貴；如果小小超只係想買《信報》呢套人才薈萃嘅軟件，又點會捨得將佢破壞呢？𠵱家小小超搞收費電視財經台，如果佢出重金買《信報》，無非都係想買呢個星光熠熠嘅組合，又點會自己親手拆《信報》個招牌呢？如果小小超買《信報》只係為咗省電盈招牌，大可搞搞公關，兩三億搞公關算係天文數字啦！《信報》都算係一份支持自由市場嘅報紙，對呢個咁簡單嘅市場原則粉絲們應該會明啩。
利世民唯一唔明者，係點解個個精英都聲稱係《信報》粉絲，但係賣盤又只得嗰兩億幾？一份報紙最大嘅資產，除咗編、採同評論嘅精英，就係精英嘅讀者。《信報》有咁多頂級精英粉絲支持，十億都值啦！
利世民