上個禮拜蘭西講到怡居地產沙田兩間分行結業，提到身兼中原地產老闆同怡居常務董事嘅王文彥，做代理又做淡友，幾獨特。王生噚日就喺中原網頁回應，解釋淡友可以做代理嘅理由。
佢話作為一個地產評論人，係尋找同掌握物業發展嘅客觀規律，同讀者分享，永遠唔會唱好或唱淡，只會喺適當時候表示睇好或睇淡，一切隨發展規律變化而變化。所以永遠唔會一面倒睇好或睇淡。
王文彥又引用自己○四年寫過嘅文章，指代理呢行有起有跌，若跌市時離場，市好時就唔可以食盡個升浪。不過，若有客引用佢嘅說話唔買樓，佢會叫夥計同個客講，老細嘅說話都係一家之言，唔一定啱，然後再提出自己嘅觀點，必要時仲可以引用他同行老闆嘅理由㖭。
對於蘭西話睇完佢嘅睇淡言論「心都淡埋」，佢強調自己只係一家之言，若果蘭西覺得唔啱聽，可以一笑置之喎，況且佢嘅言論，只係試圖捕捉趨勢，沒有改變趨勢嘅能耐......咁王老闆始終係老行尊，佢嘅睇法，又點可以輕視呢。