「燒雞翼我鍾意食～」、「自從峨嵋山上見到你～」、「冚家鏟泥齊種樹，汝家池塘多鮫魚～」𠵱家搭車行街，身邊愈嚟愈多呢類啜核MP3手機鈴聲，聽到自不然會打個突，跟住會發出會心微笑。講真，𠵱家十個手機九個都再唔係下載歌手鈴聲，而係改用Download自Cut搞笑鈴聲，當中最爆莫過於女性呻吟鈴聲，今日搵嚟身穿誘惑睡衣的模特兒地鐵車廂試播，發覺男嘅扮唔望又偷望，女嘅反而會笑出聲。
記者：羅灝汶
攝影：楊錦文
模特兒：Cat（Salvador）
叮噹最受歡迎
差不多個個網上討論區都會有自創鈴聲畀網友分享，Cat呢段日本女優呻吟鈴聲亦一樣轉錄自討論區。其實自從手機有錄音功能開始，基本上一切聲音都可以轉換成個人鈴聲，而𠵱家又的確少咗人用真人唱的MP3做鈴聲，反而古靈精怪廣告歌、電視電影經典對白、節錄朋友叫聲等等愈騎呢嘅鈴聲就愈受歡迎。
認真翻查點閱次數，初步估計本地配音員錄製嘅一系列叮噹鈴聲最多人Download，香港討論區入面嘅「叮噹訊息鈴聲系列」就有差不多47,000人點閱或者下載，其次數到「周星馳系列」鈴聲，無錯，星爺唔係歌手，不過佢好多戲嘅經典對白都係手機迷心頭好。
1.香港討論區
「叮噹訊息鈴聲系列」有差不多47,000人捧場，港女鍾意叮噹把聲。
http://www.discuss.com.hk/
2.KTzone
Cat非常露骨嘅高潮鈴聲就係由KTzone下載。
http://ktzhk.com/
3.Uwants
Uwants入面的「搞笑鈴聲系列」，一樣有超過68,000人點閱。
http://forum.uwants.com/
YAHOO!鈴聲Twins五甲不入
本地合法下載鈴聲網站都唔少，YAHOO!同yeahmobile歌曲齊備不過收費高昂，一首大概30秒嘅歌曲鈴聲收$15至$20不等，手機迷唔轉玩古怪鈴聲至怪，至少有趣搞鬼得多。某程度上，鈴聲下載榜亦反映歌手受歡迎度，就以YAHOO!為例，頭3位分別係王光良《約定》、衞蘭《MyLoveMyFate》同陳奕迅《最佳損友》，Twins五甲不入，楊千嬅、李克勤等所謂嘅一線歌手更加連影都無。
街坊：愈騎呢愈要Download！
叮噹：你好快啲起身喇～
PC：「我成日上網搵免費鈴聲，自己就最鍾意叮噹把聲，無嘢㗎，夠得意咪得囉，我諗男仔都唔怕用啦，每朝早都係靠佢嗌我起身㗎。」
叮噹：有電話搵你呀～
Phyllis：「我諗好少人會上網站Download鈴聲，Download全首歌都係$10，一段30秒嘅鈴聲反而要$20，唔化算，我有齊叮噹系列鈴聲，普通百寶袋聲音以至叮噹說話都有齊。」
星爺：燒雞翼我鍾意食，但係你老母講你就快釘～
碧米：「自己鍾意Cut啲外國歌做鈴聲，本地嘅就鍾意周星馳系列，佢把聲真係笑爆嘴，無得頂。」
古天樂：自從峨嵋山上見到你，今朝又喺扯旗山上見番你～
俊仔：「我入搞笑歌，好唔鍾意同其他人撞歌，古天樂嗰首峨嵋山真係好好笑㗎。」
Jacky仔：去迪士尼做足準備，玩得開心至醒係你
Winnie：「其實鈴聲都幾反映到個人性格，我唔開心就會用慘情歌，𠵱家用緊Jacky唱嘅廣告歌，好Cutie。」
小吉：BA-BI-BA-BI-BU
Cat：「如果真係有人用呻吟鈴聲，我實笑死，𠵱家用緊《IQ博士》入面嘅小吉叫聲，貪佢夠可愛嘛。」
廣告歌：出前一丁麻油麵～
陳太：「我叫阿女幫我入歌，多數揀卡通片歌入落手機，出前一丁麻油麵係首廣告歌，貪佢得意又唔會同其他人撞歌囉。」
不知名女聲尖叫
Steve:「合法網站下載鈴聲好貴，出面街Download又要成$20一首，搵啲有趣鈴聲好過囉，我用緊一班女人一齊尖叫嘅聲音，炒耳得嚟好抵死。」
揀呻吟聲≠性開放
臨床身心行為學家李寶能：「鈴聲嘅喜好同選擇絕對反映到性格同個人喜好，有啲人專登用誇張鈴聲去吸引人，實情係隱藏緊自己性格保守一面，所以用呻吟鈴聲唔代表一定性開放，就等於有人着衫好誇張，其實個人本身可能好保守。仲有，人會隨住情緒變化而改變鈴聲選擇，開心嗰陣啲鈴聲會搞笑啲，傷心嗰陣會揀啲悲情歌，不過普遍而言，揀得叮噹做鈴聲嘅，個人本身性格一定傾向樂觀。」
下載鈴聲＝侵權
喺討論區Download鈴聲算唔算犯法？鄧達明律師咁話：「理論上所有Cut歌或者Remix歌曲，未經版權持有人同意，而一般大眾又聽得出呢首歌屬版權持有人擁有，咁已經屬於一種侵權行為，所以合法下載網站都有細則同條款表明歌曲唔可以隨便轉發，一轉發就已經觸犯合約條款，如果利用侵權歌曲作販賣用途就仲大件事，人哋有權從民事訴訟索償！至於用啲舊廣告歌當鈴聲其實都算侵權，不過好多時版權持有人已經搵唔到，實際上無乜追究風險，用叮噹鈴聲相信唔會犯法，因為本地配音員聲線日本無申請到《多啦A夢》Trademark。」
