喺PS2大收旺場嘅「武道會」系列，令《龍珠》熱潮突然間又喺香港翻炒，漫畫同精品繼續大賣特賣。PSP貴為時下機能最勁嘅手提機，將《龍珠》以3D畫面及無線對戰重新包裝，就能變成大家趨之若鶩嘅心頭好，美版更快過日版現身，想同隔籬左右、隨時隨地係咁「卡咩哈咩哈」都得啦！
文：陳福榮
PROFILE
遊戲類型：格鬥
對應機種：PSP
遊玩人數：1人（支援Wi-Fi對戰）
開發商：ATARI
售價：$328
售賣點：DreamStore（25753285）
地址：灣仔東方188商場G04、256號舖
咪睇佢封面印住ATARI個標誌，以為呢隻美版係啲混水摸魚嘅垃圾，其實佢正好係日版「武道會」系列始作俑者Dimps開發組嘅全新力作，將PS2過往三集優點盡情喺PSP身上發揮出嚟！賣點取自95年公映劇場版《龍珠Z復活的合體！悟空與比達！》身上，以兩位新角拜古安同邪念波作故事基礎，再加部份原創劇情拼砌而成。除咗大家耳熟能詳嘅故事，其他閒角均有自己嘅古仔，玩落豐富得多。
集PS2三作優點
《真武道會》以《龍珠Z3》作為開發藍本，並增設釋放鬥氣一瞬間加強速度同力量嘅全新系統「AuraBurst」，亦衍生四個分支，分別有超高速衝向對手後閃避嘅「Dash」、將鬥氣放喺拳腳招以構成強力一擊嘅「Smash」、極速貼近對手再連抦一鑊嘅「Rush」同儲氣發射氣功嘅「必殺技」。而遊戲全部18個角色，都有好似龜波氣功同元氣玉之類嘅超強「究極技」，今集會將定格播片改為實時發動超必咁款，大大增加臨場感，此外當然唔少得上集備受好評嘅「變身」同「合體」系統。
隨時亂入過招
只要喺Ad-HocMode選擇等待挑機，就能夠同附近玩家作Wi-Fi對戰，原理有啲似NDS隻《任天狗》咁。此外佢仲新增咗自行設計卡片嘅ProfileCardMode，會喺通訊對戰嗰陣順便將卡片傳送畀對手，等人哋知道你嘅對戰成績，如果打得勁真係可以靠佢起朵都唔定！咩「九龍灣悟天」或者「太古城超西」，任你自己Set啦。
個人評價
《龍珠Z》大大話話都喺PS2出過四次，而呢隻係最受歡迎嘅「武道會」改編過嚟，想佢出得好差都幾難。大致上好多點子都熟口熟面，搞到玩起嚟有點兒「為儲嘢而儲嘢」，不過今次就變咗儲角色同儲劇情枝節，比起之前養人玩法差咁些少。然而有兩大劇場版勁角加入，兼且保留番變身同合體系統，乜嘢唔好地方都即刻抵番晒。
美版可揀日文配音
唔係有特別偏好，相信都唔會逼自己玩日版。PS2嗰幾集《龍珠Z》都係美版行先，唔少人都等唔到日版出至玩，所以對佢啲英文由難頂慢慢變成接受！如今PSP版仲可以揀日文語音，玩起嚟似足睇卡通片，都算係本地用家最想得到嘅結果囉。日版要到下個月尾至出，價錢仲唔慌平，不過如果喺日本訂就會送多個套，唔知到時香港又會返到幾多貨？
