一部睇落外表平凡，只得加減乘除混算嘅計數機，原來內有乾坤！佢最強招式，並非用嚟計數，實際上，佢最叻就係「出貓」！簡單啲講，就算你帶住呢部三星P300返學考試，考官亦唔會察覺到，佢其實係一部手機；更重要嘅只要你Send個SMS向「出面」求救，然後再接收埋答案訊息，真係公然出貓都冇人知！
記者：陳國輝 攝影：陳盛臣
P300屬於三星卡片系列嘅處女作，係咪向NEC致敬就不得而知，但造型就比佢鬼馬得多；大膽地將外觀、屏幕、按鍵統統變成計數機咁款，賣相仲好有30年前CASIO計數機味道，若果有埋至經典嘅數字打怪獸就真係正嘞！配備26萬色芒、130萬像素鏡頭、MP3等分唇絲毫不減，據「機場」Sales表示，P300原來除英文版之外，畀多三嚿水仲可改埋繁體中文，邊樣啱玩自己決定喇！
暢快！按鍵㩒到啪啪聲
比一般計數機，P300可謂高貴得多！機身採用咗銀色暗紋金屬殼，機背電池位亦換上同一質料，冷冰冰嘅手感不在話下，甚至連每一處細位，例如「Ｃ」字、四方向箭頭，以及0-9嘅字體等，全面衝着計數機設計而嚟；而更像真係，當日小記拎起部P300㩒掣試玩嗰陣，數字鍵竟發出咗一連串「啪啪」聲響，連質感都忠於原著，確實佩服不已！唯一敗筆，在於加入咗手機先有嘅電子合成音效，棋差一着。
皮套連電行孖咇
由於卡片機要遷就厚度，變相內置電池以令手機變得纖薄。結果，一來冇得隨意換電，極唔方便；二來電量頂多只維持到一日，萬一出外公幹就死晒火！今次P300總算體貼，即使厚度薄至8.9mm，亦不忘採用外置電方式，只要買定多一粒「傍身」就冇有怕；更值得一提，係跟機會送多個真皮套畀你，望真啲，佢其實內置埋電池，只要將手機底部插入去，即時可當後備電用，真係有諗頭！
鏡頭以外
記者要特別多謝鄰居嗰位六年級生Ｂ女，多得佢出書相助，借出六年級上學期數學習作，等我哋拍攝好呢張大相；但係阿Ｂ女，乜你本習作仲有咁多漏空未做嘅？呢次哥哥都唔爭你！
PROFILE
制式：GSM900/1800/1900
體積：87.5×54.5×8.9mm
重量：81g
屏幕：26萬色TFT芒
通話時間：180分鐘
備用時間：160小時
主要功能：計數機設計、130萬像素鏡頭連閃光燈、內置80MB容量、藍芽傳輸、電池連真皮套、MP3播放器
