葉璇與歐陽震華（Bobby）昨日化身為皇上與鳳姐，上演一幕搞笑版《遊龍戲鳳》介紹新款食品，葉璇非常識做，為Bobby揼骨之餘又餵包給他食，𠱁得Bobby十分開心，當正自己是真正的皇帝。
葉璇與歐陽震華昨日出席在太古城舉行的「飯tastic」記者會，葉璇扮演鳳姐，與扮皇帝的Bobby演出一幕《遊龍戲鳳》，介紹麥當勞最新推出的食品，二人都穿上古裝戲服，十分認真。
葉璇對Bobby十分體貼，除為他揼骨外，還餵Bobby食包，Bobby可謂艷福不淺。
望入宮分身家
問到穿上龍袍扮演皇帝的Bobby，酬勞是否很好？他笑說：「我係皇上喎，冇番八位數字點請得起我呀？」問扮演鳳姐的葉璇會不會被待薄？她打趣道：「我點可以同皇上比呀，咁佢（指Bobby）頭先話帶我入宮，我做咗皇后，咪可以分佢一半身家囉。」
請張文慈食飯
葉璇剛出席在上海舉行萬寶龍大派對後回港，她指在上海時，無時無刻都被狗仔隊追訪，談到黎明要坐在樓梯等候安排見傳媒，葉璇顯得有點驚訝，她說：「吓！點會呀，佢係天王，點會咁對佢呀，我哋有一個貴賓房㗎嘛，我都有見到佢舒舒服服咁坐喺梳化度，佢都不知有幾多保安照顧佢，真係羨慕死人。」對於與張文慈同遊食飯，問到二人究竟是敵是友？葉璇謂：「梗係朋友啦，唔係我都唔會請佢食飯啦。」
採訪：胡比
攝影：陳偉權