話咁快又冬去春來，見到又薄又貼身的春夏裝真係好鍾意，但一拼上身，見到突出的胃腩肚腩，真係乜購物慾都冇晒，醒覺再唔減肥就嚟唔切啦。要減肥當然要做運動，但咁辛苦，我最多只會有3日恒心。有邊個唔想坐喺度，個人毋須點郁就減到肥？得！你肯投資就得，因為騎馬機幫到手。坊間Hit緊嘅3部騎馬機，想知邊部最值得投資，通過以下5大測試就自有分曉。
記者︰劉昱蘭
攝影︰陳盛臣
Model︰Lin&Peggy（Salvador）
Wardrobe︰TAKE5（27243883）尖沙嘴利時商場422號
比拼一 靚仔度+招式
話明係騎馬機，當然要似馬。首個比拼一於比呢隻「馬」外形、招式和價錢，睇睇邊部合你要求！
1號 Panasonic第三代JOBA騎馬健體機
曲線+腳踏最神似
座椅有曲線，似坐落真馬背咁，櫈面的軟墊幾舒服，又有腳踏，搞到小記上馬時，真係好有姿勢咁，踩咗上腳踏度上馬。
懶人至啱
招式方面，有９個速度，一個坐姿配合三個模式，包括腳力程式、收腰程式和收臀程式，連自己郁轉Pose都慳番。
售價：$12,800（C）
2號 OSIMiGallop健馬師
座椅扁平似張櫈
櫈面太過扁平唔似馬仔，因為佢冇弧度，總係覺得個人會震到移前，玩玩吓要自己坐番後。但勝在有紫、黃兩色揀吓，Sharp晒。
坐姿多有睇頭
呢隻馬有4個速度，可慢步配熱身動作、快步配收腰動作、跑步配收髀動作和循環配收腰旁「鬼祟肉」，雙腳擺喺唔同地方，都有唔同收身效果。
售價：$5,880（A）
3號 Image太空船形騎馬機
完全冇馬樣
三尖八角，似部穿梭機多過似馬仔。冇坐墊，坐落硬身冇咁舒服。
冇嘢好揀
只有兩種速度選擇，模式欠奉，而且機形Fix死坐姿，想自己就番部機都唔得。
特價：$4,800（原價$6,800）（B）
比拼二 收腰
把13粒Pack箱膠填滿膠杯，然後用皮帶將膠杯綁於腰間，15分鐘後睇吓Fing剩幾多喺隻杯度，剩得愈少就代表腰部運動量愈大。
1號 剩4粒
Panasonic的「8字形」搖動，擺動動作大，更能運動腰部。因為除咗前後郁，「8字形」向左右兩邊搖的幅度，比「V字形」闊好多。Model都話騎Panasonic條腰不停咁扭，運動量勁過齋前後郁的Sit-up。
2號 剩7粒
OSIM的「V字形」動作，雖然話可向前後左右傾斜擺動，但試騎時似坐喺一張會前後震的櫈多啲，左右擺的感覺好弱，Fing得唔夠勁。
3號 原封不動
IMAGE會打圈咁郁，其實好似做呼拉圈咁都會收到腰，但衰在郁到好似阿婆玩呼拉圈咁，搖得太慢，要成1秒多啲先扭到一個圈，實在太弱。
比拼三 收大髀
將泥膠填滿膠杯，放喺大髀同部機中間夾實，15分鐘後睇吓邊個最變形，愈畸形雙腿愈出力，收緊作用愈大。
1號 裂痕唔夠大
部機似足騎馬仔咁有個腳踏，可能啲力卸咗落個腳踏度，大髀唔需要咁出力，所以膠杯都有裂開，但就冇爆裂同埋飛出街。
2號 爆裂飛出街
Model熱身時雙腳放於兩旁和前方，6分鐘度就聽到「啪」一聲，個杯裂咗。之後將雙腳蹺在後馬腳，再提起少少Hip，呢嗰Pose迫Model雙腳出雙倍的力，結果個杯飛咗落地。玩完後，大髀又痠又痹，好Work！
3號 得個凹字
由於個放腳位係一個平面，雙腳好輕鬆咁成隻放上去，唔需要點出力，個膠杯都係凹得嗰少少。
比拼四 勁度
戴住牛仔帽玩，睇吓15分鐘後邊個移位移得最多，會唔會快到Fing甩帽。
1號 Fing到上頭頂
當剛開始轉到最高速時，Model不禁「嘩」一聲。睇住佢個人細細粒，喺馬上高速「8字形」咁Fing到左傾右跌，最後頂帽跣到頭頂，爭少少甩。
2號 稍稍移位
OSIM模仿馬仔慢步、快步和跑步3種速度。轉到去高速時Model重笑笑口話好自在，睇嚟速度冇咁快，冇騎Panasonic時咁慌。最後頂帽Fing到露半額。
3號 Keep到最靚
IMAGE實在冇乜料到，Model一路都保持到儀態，頂帽郁都冇郁過。
比拼五 消脂
玩完後即刻用面油紙輕印全面，帶氧運動有汗出先消到脂，從汗水睇吓邊個消脂最強。
1號 最濕
搖幅大夠高速，搞到Model香汗淋漓，濕咗多於1/4張面油紙。
2號 輸個馬鼻
搖幅同速度都差啲啲，但勝在要轉Pose，都出唔少汗，濕咗差唔多1/4張面油紙。
3號 完美面油紙
Model玩完都Keep到靚一靚，仲要係汗都冇滴。
賽後分析
綜合以上5項比拼，Panasonic以五局四勝，大比數勝出！雖然呢隻馬仔價錢貴，但「分唇」同玩法都夠多，而且最緊要Work吖嘛！
騎馬Do's&Don't
Do
1.腰板要挺直，可以有埋鬆脊椎和盆骨等的物理治療功效，骨鬆自然筋都鬆埋，成個人舒服晒。
2.玩耐咗就唔好用扶手，多啲靠腰力去攞平衡，收身效果更明顯。
Don't
唔好太急進一開就開最高速，個人掌握唔到個速度，攞唔到平衡，一樣冇效果。
靚女點睇
（A）OSIM （27902300）
（B）JCLadies （25590226）
（C）Panasonic （28330955）
