深圳控股（604）噚日宣布任命人稱Joe爭(「張」嘅普通話發音)」嘅張化橋做營運總監。可能因為佢加盟嘅消息在上星期已流傳，春江鴨四處游，深控股價已經連升5日，張老哥有咁嘅效應，都幾巴閉。其實上市公司搵到個猛人入主，對股價有助，都有好多例子。遠嘅有8號仔三年前覓得JackSo加盟，股價即刻升左一浸，近嘅有王兟接咗莊老細檔273威利國際，即係以前嘅互聯控股，亦炒咗一轉。至於長線計間公司會唔會因為有個高手就脫胎換骨，鬼有人理咩。
講番阿Joe，佢之前任職瑞銀證券董事總經理兼中國研究部聯席主管，做咗7年。早幾年民企股當炒時候，阿Joe編製咗一個民企指數，因此佢被稱為「民企之父」。不過，呢個民企之父在01年底發表報告，質疑民企格林柯爾（8056）嘅的盈利能力，被格林主席顧雛軍告佢誹謗，最後要賠30萬元和解。後來歐亞農業爆煲，楊斌做唔成新義州特首，民企熱潮亦冷卻下來。雖然係咁，最近5年阿Joe四次被《亞洲貨幣》雜誌評為中國最佳分析員，有個咁叻股票嘅高手做營運總監，你估深控係咪有番運行呢?