近排趕稿趕到嘔，到前日放假先正式開隻《FFXII》嚟玩吓。未玩前已聽到唔少行家對呢隻大作嘅評價；資深機迷話故事一流、玩法新鮮，捧開《FF》嘅人話變化太大接受唔到，RPG新手更話煩到痹！電腦男玩咗幾個鐘，感覺真係好鬼《FFXI》嘅OnlineFeel，一開波嘅王都實在太大太複雜，喺操作未熟底下，周圍攞情報同到訪各店舖已筋疲力竭，搞咗成晚先出到城打怪獸，跟手又到戰鬥系統大變，由傳統回合制改成動作式嘅ARPG，仲要係點走都避唔到敵方攻擊，最慘喺武器店買到較勁嘅道具，唔能夠即時裝備，需配合執照盤嘅條件。唉，好煩嘅《FFXII》呀！
同機王PS韜傾開，佢居然力撐：「好多人唔慣佢咁大變化，開Game冇耐已放棄，你畀心機玩落去啦，一定有驚喜！」到噚日為止，電腦男玩咗近10個鐘，開始習慣個戰鬥系統，王都已行熟晒，劇情亦見眉目，漸漸感受到《FFXII》嘅吸引力，𠵱家仲心掛掛想早啲返屋企煲Game㖭！
3月20日 心情：期待