唔肯認搞智經基金係幫煲呔連任嘅陳德霖，噚日就喺國家十一個五年計劃研討會上現身，肥龍係主講者之一，唔怪得攞命陳一落飛機就趕去捧佢契爺場。
呢啲研討會好鬼悶，唔少人聽咗陣都閃咗，但德哥好專心，雖然身邊走咗唔少人，佢都坐定定唔郁，仲坐咗幾耐先去廁所，真係夠晒忍耐力！
啲記者都係趁佢去廁所，先至有機會問佢智經基金籌款籌成點？但德哥唔肯答，去完廁所即刻坐返喺位度聽十一五，認真冇佢符。
八方聽智經發言人危太話，佢哋已經搬咗入海富中心新寫字樓辦公，但係由於攞命陳成日要外出，未有時間好好坐低講清楚啲工作，所以要大家等等，月底會招呼記者傾吓偈。
傳真︰2623-9278
電郵︰[email protected]