中國石油公司(857)噚日宣布天文數字一樣嘅業績：好多萬億元人民幣嘅營業額，好多千億元人民幣嘅盈利。不過作為投資者，最緊要睇嘅兩個數字，就係市盈率，同埋盈利升幅。
中石油噚日收市價HK$7.80，以佢哋2005年利潤，市盈率係大約10.5。即係話如果佢哋嘅盈利不升不跌，只要用10年時間，中石油就可以賺回股價，又可以理解成投資者用HK$10.5去買HK$1既利潤。做個比較，同樣HK$1利潤，長江生物科技（8882）嘅股東就要用HK$494.7才買到。
點解同樣HK$1利潤，一間用HK$10.5的成本便買到，另一間要用到HK$494.7才買到呢？因為前景囉！中石油都只不過有解放軍做後盾，去擴大供應潛力，亦有祖國嘅全面財力支持，去實現供應潛力，更有中印持續經濟增長，去增大市場需求。長江生物科技就有李超人嘅特異功能，一定無得比！
炒石油股其實好簡單，千祈唔好因為有好多大家都睇唔明嘅詞語，例如「實現油價」、辛烷、油當量等，就以為石油業好複雜。既然香港投資者對石油化工業唔熟，所以最好將佢睇成「麵包公司」，而生產原油就係種植「大麥」，提煉石油就係「磨麵粉」，最後交貨到油站零售點就係「麵包店」。想知道究竟石油公司盈利仲有無升值潛力，只要睇幾樣嘢就可以嘞。
第一，「大麥」產量有冇增加，中石油一向產量冇乜增長，不過𠵱家可以出外國收購「田」所以可以睇好。第二，「大麥」賣出價有無提升。因為生產「大麥」成本每年都差唔多，所以「大麥」價上升會對盈利有幫助。第三，𠵱家大陸因為國家政策，「麵粉」同「麵包」嘅價錢都受到管制，所以每做一份「麵粉」或「麵包」都要蝕錢倒貼。仲有，「麵粉」和「麵包」可以輕易被人輸出國外，如果「麵粉」和「麵包」價格都比國際價格低，就會出現走私及短缺等現象。
當然如果「麵粉」和「麵包」可以追貼國際價格麵包公司便不需要倒貼。金手指今日想篤醒大家，呢三大主宰中石油利潤因素，都會在06、07、08繼續好轉。所以就算長江生物科技有超人，我都寧願買市盈率10.5嘅中石油。上次獨贏就叫大家買實貨白銀，呢場獨贏就叫大家買中石油。
建議買入：中石油目標價：HK$9.8年期：十二個月
孫柏文