九鐵一班總經理到九鐵中環辦事處聲援署理行政總裁黎文熹，畀特首一個藉口，下令紀律處分，卒之搞到黎文熹辭職與市務總經理黎啟憲被炒。
一啲中環CEO級人馬，都認為田北辰與黎文熹兩個人都要炒——如果董事會真係有權嘅話。假如呢類事件發生在上市大公司，大公司董事會要向股東負責，當然會同時撤走主席與行政總裁。但係，九鐵唔係上市公司，九鐵管理局成員係橡皮圖章，懵盛盛，事前不知情，事後聽命令，自然處事方針係以政治掛帥。秋後算帳既已開始，成班九鐵管理局成員都應該辭職，以示問責。特別係香港大學首席副校長王于漸係知名經濟學者，平時既已忙到頭頂出煙，在九鐵管理局內又發揮唔到作用，做乜要戀棧，唔通佢嘅公職唔夠多咩？做咁多份而又有時間寫學術論文，王教授真天才也！
唔係CEO級數嘅經理級人馬（經理級）就同左丁山講，經理人員可能上有八十歲父母，下有二十一、二歲兒女，叻嘅話重係讀緊田二少嘅母校康奈爾、哈佛，你估學費平呀？家庭負擔輕呀？領年薪二三百萬當然夠使，但萬一冇咗份工，點算？五十歲人搵唔到同樣職位㗎！所以幾位老友話想極都唔通，點解班九鐵總經理竟然咁勇，為挺黎文熹而不惜危害自己嘅家庭經濟！
此其中可能再有兩個解釋，第一就係谷到爆，忍無可忍，誓把皇帝拉下馬，第二就係黎文熹平時人緣好，夠義氣照顧班兄弟。大公司不容第二項（因為容易變成山頭主義，損害公司管理，九鐵內部有冇就唔知）。左丁山相信田北辰好本領，可以令到咁多應該好怕事、好為自已着想嘅白領經理總經理夠膽齊起反對佢。
你有冇試過做工做到氣頂，谷到爆想話立即辭工？但一諗起父母妻兒，就頹然坐下，繼續忍忍忍，呃自己百忍會成金，其實黃金大可能成爛銅？同情田北辰還是黎文熹，睇你係老闆還是打工仔而定，千祈唔好相信甚麼公司文化改革。口號係用來欺騙無知群眾嘅。