香港人不嬲都好甜食，近年唔只女孩子可以聲大大話：「我真係好鍾意食甜品㗎！」不少男孩子都直認不諱加入甜品敢死隊，無甜食不歡，真係唔怪得之甜品舖開到成行成市，款式仲日新月異。就好似前幾日，小記發現有人竟然將雜果撈拉麵同河粉，心諗：到底啲麵係鹹定甜?!啲味會唔會好怪？
記者：周樺婷
攝影：譚盈傑
天后嘅食肆唔似銅鑼灣嘅逼得咁緊要，仲時不時畀到驚喜你。好似呢間「燕樂居」，都係口淡淡想食甜品之際貢咗入去，但就俾我發現佢哋嘅河粉好趣致，係要用鮮雜果撈嚟食！
椰汁河粉的誕生
可能大家都有疑問，究竟咩係椰汁河粉？話說燕樂居老闆林師傅係福建晉江人，小時候家鄉有一款用海藻製造、蘸上蜜糖或砂糖食用，名字叫「石花膏」嘅甜食，林師傅對小時候嘅家鄉甜品念念不忘，來到香港做甜品師傅，都記掛住想將石花膏發揚光大。從入行做甜品師傅至今的三十多年期間，林師傅都曾經向不同連鎖甜品舖推介過呢款甜品，可惜各方面都不敢採納，於是林師傅決定自行開舖推出，並加以改良，加入椰汁及經過不斷調校成份比例，最後成為呢款比家鄉甜品石花膏更具彈性、更滑身、更爽口嘅椰汁河粉。
海藻扮河粉
古仔講到呢度，相信聰明嘅讀者們都已經知道，其實椰汁河粉並唔係普通用米做嘅河粉，而係由海藻提煉而成，加入椰汁待凝固後，再切成河粉狀，拌上各式色彩繽紛的水果。除咗椰汁河粉外，林師傅亦選擇用海藻去做其他甜品，例如水晶絲、海中燕、綠茶涼粉等等，統稱為「海藻粉」，只係韌度、滑度各有不同。
其他推介
激似燕窩：芒果海中燕$20（a）
芒果海中燕嘅賣相激似燕窩，雖然見到芒果拌類似燕窩嘅東西好似怪怪哋，但嗒落又OK喎。始終由海藻粉製成，質感幾啱夾水果食，海中燕嘅口感仲好滑溜㖭。
雪糕鮮果水晶絲$23（a）
水晶絲，顧名思義十分晶瑩剔透，賣相甚佳，比椰汁河粉稍為腍身一點，加埋雪糕、蜜瓜、西瓜一齊撈，雪一聲食埋條水晶絲，勁爽！
林師傅Profile
自小鍾意煮嘢食，特別係甜品，入行超過30年，曾任不少連鎖甜品舖師傅。自己開設甜品舖已兩年，成功將家鄉傳統甜食加工改良，成為開創「椰汁河粉」系列甜品的原創者。同乖仔阿雄拍住上，仲打算半年內喺銅鑼灣開多間分店。
食客有Say
表情多多嘅學生妹Kary（右）同Keroro係呢度嘅常客，放咗學特登喺灣仔過嚟，Keroro幫襯咗鮮雜果椰汁河粉，大呼好味。
a.燕樂居（25129378）
地址：北角電氣道凱旋大廈21號地下（天后地鐵站A2出口）
紅磡區，畀人感覺殘殘舊舊，唔潮又唔旺，如果你真係咁諗，就大錯特錯喇！好似呢間位處紅磡嘅「甜品工房」，就出新招自創鮮果拉麵，口碑大好，好多客都食過翻尋味！
新派甜品鮮果拉麵
店舖打正旗號sell創意，皆因由兩個二十多歲嘅後生仔主理，佢哋諗頭多多，時不時會坐埋度吓有咩新嘢搞。鎮店招牌甜品鮮果拉麵就係佢哋打響頭炮之作，用果凍粉混合芒果汁、香油和鮮奶，待凝固後切成條狀，就成了自家製作的芒果甜拉麵，拌上其他新鮮雜果，頂層灑上貌似蟹子嘅韓國海藻珠及刨冰，鮮果拉麵就大功告成！拉麵本身煙韌得嚟相當彈牙，口感同真嘅拉麵幾相似，但更多幾分滑溜，啖啖都帶有芒果鮮甜味。
老友鬼鬼拍住上
兩位店主老友鬼鬼，大家都係外國留學返嚟，相識已經超過十幾年，其中Brian曾在土瓜灣與家人開過傳統糖水舖，Dominic就喺日本住過數年，兩人都主張店舖走新派甜品路線。Brian雖然曾學過幾年的甜品烹調，技巧得到磨練，但亦不諱言：「其實甜品嘅款式都係經過不斷嚐試，邊諗邊撞咁得返嚟。」而Dominic就從日式甜品偷師，將人哋嘅優點吸收，自行改良以迎合香港人嘅口味。呢兩個後生仔，雖然剛剛加入甜品行列，但亦不得不佩服佢哋嘅認真，好多細節上都落足心機。表面平平無奇的甜品，其實花了大擔心機研究改良。
其他推介
冰糖糙米杏仁糊
$13（小）$16（大）（b）
先將龍王杏炒香，混入糙米磨碎，再用冰糖煮。因為加入了糙米，呢款自家磨製杏仁糊既有杏仁香，食落卻少了刺鼻的杏仁味道，十分幼滑。
特大日本紅豆：日式紅豆豆腐花$16（b）
靈感源自一種日式甜品，亦採用大粒較甜嘅日本紅豆撞港式豆腐花，加入自製的糯米丸子及栗子，煙韌、滑溜、爽腍，三種口感一次過試晒。
宇治金時$18（b）
日式紅豆、自製雪糕及糯米丸子，拌上綠茶汁及刨冰一齊食，絕對係消暑佳品。
Brian&DominicProfile
兩個外國留學生Brian（左）同Dominic回流後拍住上搞甜品舖，以「創意甜品」作定位，招牌作鮮果拉麵贏盡口碑。時有諗頭創作新派甜品，據聞正在積極鑽研一款Wasabi口味Mousse，不日推出！
食客有Say
創意甜品就梗係吸引年輕男女，Ruby就係其中一位，佢次次嚟都要食番碗芒果拉麵。
b.甜品工房（22641028）
地址：紅磡寶其利街59-67號寶威大廈2號舖