香港新聞真係五分鐘熱度，上個星期人人都講九鐵，田二少同黎文熹日日見報，但係一出咗魔鬼警察徐步高，就冇人理田二少單嘢。
咁又係，三個警察互相射殺，兩個忠嘅，一個奸嘅，好睇過西片，𠵱家曾國恒因公殉職，冼家強又未講得晒啲詳情，故事仲有排發展，唔怪得啲報紙咁好賣，因為大家都欲知詳情，所以每日要追嚟睇。
話說當晚好好彩，如果唔係班記者跟警察去旺角區掃黃，都聽唔到有人喺傳呼叫開槍，因為李一哥改晒用數碼系統，記者偷聽唔到機，好難第一時間去到現場。
單案咁血淋淋，徐步高行為又咁可怕，真係驚嚇，以後都唔知好唔好信警察，八方聽聞警隊覺得好痛心同可惜。
立法會保安事務委員會主席涂謹申就希望警方盡力收集有關魔警嘅心理狀況，作為日後參考，以免再出現類似人物。
佢目前都唔敢去打擾班警察，總之一有消息希望佢哋公布，但係就唔好未查清楚就話冇啦。
傳真︰2623-9278
電郵︰[email protected]