中環某間名人茶餐廳出品嘅咖喱，一向都食到人嘴lamlam，其中一個捧場客就係大嚿。
有好嘢，分甘同味會仲好味，所以大嚿噚日就約埋成班記者去茶餐廳品嚐全咖喱餐，無論係咖喱雞定咖喱牛、咖喱羊，一一應有盡有。而且同樣好鍾意食咖喱嘅張文光都有到，反而成日同老婆去歎咖喱餐嘅馬丁，就因為要上庭而去唔到，無份食。
今次咖喱餐只談風月，不談政事，咁樣，兩個大男人，不如講吓怕唔怕老婆啦。一講到呢樣，張文就好興奮，話大嚿好驚老婆，當佢好大聲講緊嘢時，只要老婆急call，佢都會即時陰聲細氣講句「喂」，簡直係前所未見嘅溫柔。
咁張文呢？佢堅持唔怕老婆，但就好愛老婆，聽到人毛管戙。張文仲攞民主黨畀人滲透單嘢講笑，話如果老婆畀人滲透，其實先最大鑊，張太聽到真係要扭佢耳仔先得。
咁張文好多時一廂情願，好似佢早前夠話羅范會調職，但係到𠵱家都未成事實喎。
傳真︰2623-9278
電郵︰[email protected]