經紀黃上周講過大陸地產股沿海家園（1124），股價較資產淨值有折讓，可以留意。話口未完，隻股昨日突然急升18.37％，收0.58元。
小初問經紀黃沿海家園急升原因？佢話隻股突然升得咁勁，傳聞好似同企業融資活動有關。
另外，岳少的豐德麗（571）近期股價係咁升，跟住仲批埋股。小初終於見到有投資者食糊減持。
昨日聯交所資料顯示，日本資金的AssetManagers，以5.80元減持2625萬股，套現1.52億元。以豐德麗現價6.65元嚟睇，似乎賣得好平，但聽講批貨每股成本價只係2.10元，其實賺到笑。
講起AssetManager，查實佢揸住國華（370）一批可換股債券，國華去年話到山西搞焦煤，雖然未見成果，但近排股價就見異動，由8仙起步，炒到昨日0.152元才調頭回落，結果倒跌6.25％，收0.135元。
雖然國華股價已經升咗咁多，但據講尚未炒完，唞一唞會再開車。
慕容小初