曾鈺成開辦事處，煲呔一拖十幾（官員）去贈興，認真畀面，相反前日公民黨舉行創黨記者會，特區官員一個都冇到，咁政府係咪大細超呢？
長毛噚日都特別因此質吓林D9，佢話政府口口聲聲話政制要有均衡參與，但政府點解只係拉大隊捧民建聯場，公民黨就影都唔見吖？
俾人質慣嘅林D9點無癮都好，都要澄清㗎，佢話政府冇官員收過帖，又點會出席呢？佢仲讚自己，話查實對長毛最好，事關長毛開辦事處時，自己都送過蜂蜜畀佢潤吓喉，懶細心。
長毛當然唔畀佢攞彩，再度諷刺林D9人如禮物，即係口蜜腹劍，引得在場人士笑到肚痛。
入咗中策組嘅細良都無去阿曾辦事處開幕，事關人哋都無請佢。自從做咗佳叔隻馬仔後，細良都要收口，佢淨係肯同八方講，喺呢啲日子，計埋首訂出研究題目，組黨等問題，一概唔回答。
傳真︰2623-9278
電郵︰[email protected]