地產代理落力扯單，都係想賺多啲啫，所以有時跑到數，上司會畀啲獎勵或者搞吓慶功，維持前線嘅鬥心。
好似世紀21兩前線William同Christy，今個月做到大碼買賣同租務，收到超過二十萬佣，所以上司執董曾應豐就請晒啲同事一齊去西貢燒嘢食，食燒豬慶功之餘，又可加強同事嘅歸屬感。
美聯就用鬥威嚟推動前線搏殺，執董陳坤興話，集團舊年出咗三十五個千萬主管，為咗鼓勵同事努力，陳董話准啲千萬主管，可以喺張卡片印「千萬圓卓會」標誌，凸顯佢哋嘅成就。咁想威嘅前線就要更加努力至得。
代理除咗搵錢，都要進修至得，香港置業就連續辦咗「利益披露」同「操守守則」課程畀前線報讀，讀完仲可以攞到獲認可嘅持續進修學分㖭。